Azərbaycan, Bakı,18 aprel / Trend , müxbir S.Babayeva / Azərbaycanda "quş qripi"nin aşkarlanması üzrə mayın12-də dördüncü monitorinq başlayacaq. Bu barədə cümə günü Azərbaycanın Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli məlumat verib.
"Monitorinq bir həftə davam edəcək, bir o qədər də laboratoriya araşdırmalarına vaxt sərf olunacaq. Yekunlar isə mayın 23-də elan olunacaq" - deyə o bildirib.
Əvvəllər olduğu kimi, monitorinq Abşeron yarımadası, Pirallahı adası, Dəvəçi, Salyan, Ağcabədi və Lənkəran rayonlarındakı milli qoruq və parklarda, həmçinin ölkənin dənizsahili zonalarında həyata keçiriləcək. Monitorinq Kənd Təsərrüfatı Nazirliyi yanında Dövlət Baytarlıq Xidmətinin, Ekologiya və Təbii Sərvətlər, Səhiyyə nazirliklərinin, eləcə də Ovçular Cəmiyyətinin mütəxəssis və əməkdaşlarının iştirakı ilə aparılacaq.
Ötən üç monitorinq ölkə ərazisində virus olmadığını aşkarlayıb.
Keçən il Dövlət Xidməti 12 monitorinq keçirib, 8 mindən artıq vəhşi və ev quşlarının nümunələri araşdırılıb. Onların heç birində virus aşkarlanmayıb.
Buna baxmayaraq, Azərbaycanda çöl quşlarının ovu, istifadəsi və satışına 2005-ci ilin payızında qoyulan qadağa hələ də qüvvədə qalır. Ölkənin sərhəd-buraxılış baytar məntəqələri ölkə ərazisində "quş qripin"nin yayılmasının qarşısını almaq üçün gücləndirilmiş iş rejimində işləyir
Dövlət Xidməti bir çox hallarda virus daşıyıcıları olan vəhşi quşlarla təmasın qarşısını almaq üçün ev quşlarını bağlı məkanlarda saxlamağı məsləhət görür.
Müəlliflə əlaqə saxlamaq üçün elektron ünvan: Capital