Azərbaycan, Bakı, 13 may / Trend , müxbir İ.Xəlilova/ Cari ilin 1 aprel tarixinə olan vəziyyətə görə, Azərbaycanın xarici borcları 2 596,5 mln. dollara çatıb ki, bu da ÜDM-dən 6,4 faiz təşkil edir. Bu barədə çərşənbə axşamı ölkənin Maliyyə Nazirliyindən məlumat verilib. İlin əvvəli ilə müqayisədə xarici borcların həcmi 6,3 faiz artıb.
Adambaşına düşən xarici borc 300,9 dollar təşkil edir.
Cari ilin birinci rübündə 32 mln. dollar həcmində kredit alınıb. Xarici borcun xidmət xərcləri 40,7 mln. dollar təşkil edib. Bununla yanaşı, əsas borcun payına 33,8 mln dollar, faizlərin payına isə 6,9 mln. dollar düşür. Büdcə borcları hesabına kreditlərin ödənməsi üçün 14,3 mln. dollar ayrılıb.
Xarici borc strukturunda 14,5 faiz ($377,7 mln.) iqtisadi islahatlara istiqamətləndirilən kreditlərin payına düşüb. Onlardan 94,3 mln. dolları (3,6 faiz) - BVF, 283,4 mln. doları isə (10,9 faiz) - Dünya Bankından alınıb. Kreditlərin böyük hissəsi - 2218,8 mln. dolları (85,5 faiz) investisiya layihələrinin maliyyələşdirilməsinə cəlb olunub. Bununla yanaşı, bu vəsaitlərin 36,4 faizi ($945,7 mln.) enerji sektoruna, 7,7 faizi ($200,4 mln.) kənd təsərrüfatı və meliorasiya sektoruna, 18,1 faiz ($471 mln.) yol tikintisi və nəqliyyat, 1,6 faiz ($41,2 mln.) kimya sənayesi, 6,6 faiz ($170,7 mln.) neft-qaz sektoru, 7,3 faiz isə ($189,8 mln.) sosial və digər sahələrə yönəldilib.
Mayın 13-nə olan rəsmi məzənnə 0,8269 AZN/USD.
Müəlliflə əlaqə saxlamaq üçün elektron ünvan : [email protected]