Gürcüstan, Tbilisi, 16 may/ Trend , müxbir N.Kirtsxaliya/ Gürcüstan Azərbaycanın Ümumdünya Ticarət Təşkilatına qoşulmasına mane olmur, tərəflər prinsipial məsələləri artıq razılaşdırıblar. Növbədə danışıqlar üzrə yekun protokolunun imzalanmasıdır. Gürcüstanın ÜTT məsələləri ilə bağlı danışıqlarını aparan iqtisadi inkişaf naziri Tamara Kovziridze Azərbaycanın ÜTT-ə daxil olması prosesinə Gürcüstanın maneələr yaratması haqqında KİV-də yayılmış məlumatı Trend -ın Tbilisidəki xüsusi müxbiri ilə müsahibədə belə şərh edib.
"Yaxın günlərdə biz protokol imzalayacağıq. Sənəd iki ölkənin iqtisadi inkişaf nazirləri və ya onların müavinləri səviyyəsində imzalanacaq", - Kovziridze bildirib.
Kovziridzenin sözlərinə görə, protokolun konkret nə zaman imzalanacağı Gürcüstandakı parlament seçkilərindən sonra bəlli olacaq.
"Mayın 21-də Gürcüstanda parlament seçkiləri keçiriləcək və protokolun imzalanacağı tarix müəyyən ediləcək. Lakin, bu artıq prinsipial məsələ deyil", - o bildirib və vurğulayıb ki, "ÜTT ilə bağlı strateji tərəfdaşlar arasında fikir ayrılıqları yoxdur".
Müəlliflə əlaqə saxlamaq üçün elektron ünvan: [email protected]
