Azərbaycan, Bakı, 27 iyun / Trend , müxbir İ.Xəlilova/ Beynəlxalq Maliyyə Korporasiyasının (BMK) Direktorlar Şurası "CredAgro" qeyri-bank kredit təşkilatına 10 mln. dollar kreditin ayrılmasını təsdiq edib. Bu barədə cümə günü kredit təşkilatından bildiriblər. BMK layihəsində əsas məqsəd uzun müddətli maliyyələşdirməni təmin etmək üçün "CredAgro"ya dəstək göstərməkdən ibarətdir. Bu layihə adı çəkilən kredit təşkilatı tərəfindən mikro, kiçik və orta kreditləşmənin genişləndirilməsinə yardım edəcək.
Layihə iki hissəyə bölünüb: əsas kredit 6 mln. dollar həcmindədir, 4 mln. dollar isə, subordinasiya krediti qismində ayrılıb ki, bu da "CredAgro"nun ikinci dərəcəli kapitalında iştirakı nəzərdə tutur. "CredAgro" ikinci subordinasiya kreditini Almaniyanın KfW inkişaf bankından almağa hazırlaşır. Bu vəsait ölkədə aqrar sektora dəstək üçün nəzərdə tutulub.
"CredAgro"da Maliyyə Korporasiyası ilə kredit müqaviləsinin imzalanması gözlənilir.
Bu gün "CredAgro" tərəfindən cəlb edilən vəsaitlərin ümumi həcmi 30 mln. dollar təşkil edir. "CredAgro" qeyri-bank kredit təşkilatı kimi məhdudlaşdırılmış lisenziya ilə işləyir. Buna görə, kreditləşmə əldə edilmiş vəsaitlər hesabına həyata keçirilir. O, 15 beynəlxalq maliyyə təşkilatı, xarici investisiya fondları və digər sərmayədarlarla əməkdaşlıq edir. Onların arasında AYİB, İsveçrənin "Dexia/ Blue Orchard" Mikromaliyyələşdirmə Fondu və digərləri var.
"CredAgro"nun hazırkı kredit portfeli 44 mln. manat təşkil edir, ilin sonunadək onun 50 mln. manata çatdrılması planlaşdırılır.
"CredAgro" ACDI- VOCA beynəlxalq humanitar təşkilatı tərəfindən 2000 - ci ildə təsis edilib. Təşkilatın Nizamnamə kapitalı 5 mln. dollar, məcmu kapitalı isə 7 mln. manat təşkil edir.
"CredAgro"nun fəaliyyəti bölgələrdə layihələrin maliyyələşdirilməsinə yönəldilib və 27 rayonu əhatə edir. Bununla əlaqədar doqquz nümayəndəlik yaradılıb, köməkçi ofisləri var. Onun kreditləşdirmə sahələri müxtəlifdir - kənd təsərrüfatı, ticari əməliyyatlar, infrastruktur və lizinqin maliyyələşdirilməsindən sahibkarlığın kreditləşdirilməsinədək, bütün istiqamətləri əhatə edir. Buraya yalnız ipoteka Aid deyil. "CredAgro" kreditləri üç il müddətinə, illik 36 - dək faiz dərəcəsi ilə verilir. Kreditin maksimal məbləği 50 min manatdır. Lakin bəzi hallarda bu məbləği üstələyə bilər.
İyunun 27 -nə rəsmi məzənnə 0,8128 AZN/USD təşkil edir.
Məqalə müəllifi ilə əlaqə ünvanı: [email protected]
