Azərbaycan, Bakı, 21 avqust/ Trend , müxbir Ü.İsmayılova/Yanvar-iyunda Azərbaycan sığorta şirkətlərinin aktivləri 223,1 milyon manat təşkil edib, - cümə axşamı ölkənin Maliyyə Nazirliyindən xəbər veriblər.
Əsas vəsait və qeyri-dövriyyə aktivləri 60 mln. manat, pul vəsaitləri və digər aktivlər 185,7 mln. manat, o cümlədən sığorta şirkətlərinin bank depozitləri 88 mln. manat təşkil edib.
İkinci rübün nəticələri üzrə passiv vəsaitlərin əsas mənbəyi 180,2 mln. manat, o cümlədən sığorta şirkətlərinin ümumi Nizamnamə kapitalı 77,7 mln. manat, əsas kapital 6,4 mln. manat, rezerv kapitalı 350 min manat, fond yığımları 2,1 mln. manat, istehlak fondu 81 min manat, sosial sahə fondu 442 min manat olub. Ötən illərdən qalan bölüşdürülməmiş mənfəət 5,4 mln. manat olub. Bu dövr ərzində bütün sığorta şirkətlərinin sığorta ehtiyatları 81,7 mln. manat olub.
Cari ilin birinci yarısında Azərbaycan sığorta şirkətlərinin mənfəəti 17,8 mln. manat olub. Onlardan 2,1 mln. manat istifadə edilib, hesabat dövründə bölüşdürülməmiş mənfəət 15,7 mln. manat olub.
Yanvar-iyunda uzunmüddətli bank kreditləri verilməyib. Qısamüddətli bank kreditləri 58,5 min manat olub.
Azərbaycanda 28 sığorta və bir təkrar sığorta şirkəti fəaliyyət göstərir.
