Azərbaycan, Bakı, 07 noyabr/ Trend , müxbir İ.Xəlilova/ Azərbaycan hökuməti əhalinin Azərbaycan SSR Əmanət Bankında 1992 - ci il yanvarın 1- dək həyata keçirilmiş əmanətlərinin indeksləşdirilməsi məsələsinə ehtiyatla yanaşmaq niyyətindədir və onun müzakirəsinə Milli Məclisdə 2007-ci ilin dekabrında yaradılmış işçi qrupundan təkliflərin alınmasından sonra başlayacaq, - maliyyə naziri Samir Şərifov cümə günü bildirib.
"Biz populist fikirlərə uymamalı, digər ölkələrin səhvlərini təkrarlamamaq üçün ehtiyatla qərar qəbul etməliyik, - nazir bildirib. Bundan əlavə, bizə əmanətlərin indeksləşdirilməsinin aparılması üçün təkliflər hələ təqdim edilməyib".
Onun sözlərinə görə, indeksləşdirməyə başlamış qonşu ölkələr əsasən ciddi maliyyə böhranı yaşayır və maliyyə yardımının alınması üçün Beynəlxalq Valyuta Fonduna müraciət edirlər.
"Bu ölkələr əmanətləri qaytarmaqla əhalinin bank sektoruna etibarını yüksəltmək istəyiblər. Əksinə, yaranmış vəziyyətdə əmanətçilər öz depozitlərini götürməyə başlayıblar", - Şərifov bildirib.
Əhalinin əmanətlərinin indeksləşdirilməsi prosesinin çətinliyi ilə əlaqədar, bu vəsaitlərin verilməsi dəfələrlə təxirə salınıb və prosesə hazırlıqla əlaqədar parlamentdə işçi qrupu formalaşdırılıb. Bu proses yalnız mexanizmin hazırlanması və "Əhalinin Azərbaycan SSR Əmanət Bankında 1992 - ci il yanvarın 1- dək həyata keçirilmiş əmanətlərinin indeksləşdirilməsi haqqında" Qanun layihəsinin qəbulundan sonra başalayacaq.
MDB dövlətlərinin yalnız bəzilərində indeksləşdirmə prosesi gedir. Rusiyada bunu 30 il ərzində həyata keçirmək planlaşdırılır. Azərbaycan parlamentində indeksləşdirmə məsələsi dəfələrlə qaldırılsa da, 2005-ci ildə Baş nazir Artur Rasizadənin sədrliyi altında yaradılmış dövlət komissiyasının qərarı olmadan, əmanətlərin qaytarılmasına start verilə bilməz. Bunun üçünsə, ölkəyə münasib əmsal müəyyən edilməlidir. Mexanizm olmadan xəzinədən bu məqsədlər üçün vəsait ayrıla bilməz. Bununla belə, 2006 - cı ilin dövlət büdcəsində əmanətlər üzrə indeksləşdirmə prosesinin başlaması üçün 50 mln. manat ayrılmışdı.
Maliyyə Nazirliyinin ilkin hesablamalarına görə, indeksləşdirmə səkkiz il ərzində aparıla bilər və bu məqsədlər üçün 600 mln. dollaradək vəsait lazımdır. Kapital Bank-da aparılmış inventarlaşdırma zamanı 1 mln. 986 min əmanətçi aşkar edilib. Onların əmanətlərinin ümumi məbləği 4,8 mlrd. sovet rublu təşkil edir. Maliyyə Nazirliyi indeksləşdirmənin aparılmasının 0,3 - 04 mlrd, 0,5 - 0,55 mlrd. və 0,8-1 mlrd. dollar tələb edən üç variantını hazırlayıb.
MDB ölkələrindən indeksləşdirmə yalnız Qazaxıstan, Qırğızıstan və Belarusda başa çatıb. Hazırda Rusiya, Ukrayna və Moldovada indeksləşdirmə prosesi gedir. Bu ölkələrdən hər birində proses müxtəlif şəkildə aparılır. Belə ki, RF-də bir sovet rublu 0,0033 dollar, Qazaxıstanda - 0,006 dollar (və ya 1 dollara görə 150 rubl), Ukraynada - 0,009 dollar, Belarusda - 0,33 dollar, Moldovada - 0,20 dollar, Qırğızıstanda - 0,024 dollar kimi qəbul edilib.
Müəlliflə əlaqə saxlamaq üçün elektron ünvan: [email protected]
