Azərbaycan, Bakı, 19 noyabr / Trend , müxbir İ.Xəlilova/ İqtisadi İnkişaf Nazirliyi (İİN) yanında daxili nəzarətlə bağlı bölmə yaradılıb. Bunu hökumətdəki səlahiyyətli mənbələrdən bildiriblər. Qurumun yaradılmasında əsas məqsəd şəffaflığın artırılması və nazirliyin işinin səmərəli təşkil etməkdir.
Daxili nəzarətlə bağlı bölmə iqtisadi inkişaf naziri Şahin Mustafayevin əmrilə yaradılıb.
"Azərbaycan prezidenti İlham Əliyev İqtisadi İnkişaf Nazirliyinin, xüsusən onun bir sıra strukturlarının işindən narazıdır. Daxili nəzarətlə bağlı bölmənin vasitəsilə İİN strukturlarının fəaliyyəti araşdırılacaq" - deyə Mustafayev bir müddət əvvəl bildirib.
Nazirin sözlərinə görə, qurumun gələcək fəaliyyətində əsas diqqət milli sahibkarlığın intensivləşdirilməsinə yönələcək.
"Biz ciddi qüsurları aradan qaldırmağı planlaşdırırıq ki, layihələr daha real və səmərəli olsun. Kreditləşmə daha şəffaf həyata keçirilməlidir. Prioritet qismində əsas diqqət regionların inkişafına yönəlməlidir", - deyə Mustafayev qeyd edib.
Onun sözlərinə görə, nazirliyin əsas fəaliyyəti sahibkarların əsassız yoxlanması deyil, onların fəaliyyətinin dəstəklənməsilə bağlı olmalıdır.
"İqtisadi İnkişaf Nazirliyi sahibkarlığın inkişafına yardım göstərəcək", - deyə nazir bildirib.
Müəlliflə əlaqə ünvanı: [email protected]
