Azərbaycan, Bakı, 20 dekabr/ Trend , müxbir N.İsmayılova/ Azərbaycanın Dövlət Əmlakının İdarə Edilməsi üzrə Dövlət Komitəsi Biləsuvar-Pambıq səhmdar cəmiyyətinin səhmlərinin 30,09 faizinin satışına sərmayə müsabiqəsi elan edib, - Dövlət Komitəsindən şənbə günü bildiriblər.
Müsabiqədə Azərbaycanın fiziki və hüquqi şəxsləri və xarici sərmayədarlar iştirak edə bilər. İddiaçılar pambıq emalının təkmilləşdirilməsi və onun satış həcminin genişləndirilməsi üzrə sərmayə proqramını təqdim etməlidirlər.
Müsabiqədə iştirak etmək istəyənlər sərmayə təkliflərinin beş faizinə bank zəmanəti və dövlət büdcəsinə 200 min manat ödəmək barədə təklifləri təqdim etməlidirlər.
42,11 ha sahədə yerləşmiş Biləsuvar-Pambıq pambığın qəbulu, emalı və satışı ilə məşğul olur və Biləsuvar şəhəri, S.Vurğun küçəsi 1 ünvanında yerləşir.
SC - nin Nizamnamə kapitalı 2,48 mln. manat təşkil edir. Bu məbləğdə hər birinin nominal dəyəri 2 manat olan 1238762 səhm buraxılıb. Müsabiqənin predmeti nominal dəyəri 745,51 min manat olan 372757 səhmdir.
2008 - ci il noyabrın 1-nə olan vəziyyətə görə, müəssisənin 6,13 mln. manat məbləğində, əmək haqqı üzrə 28,96 min manat borcu var. Müəssisənin debitor borcları 1,1 mln. manat təşkil edir. Xammalın alınması və göstərilmiş xidmətlərə görə ödəniş borcu 6,1 mln. manata çatır.
1993 - cü ildən fəaliyyət göstərən, müəssisədə 47 nəfər çalışır.
İddiaçılar 2009 - cu il yanvarın 27- dək saat 10:00 - dan 17:30- dək Bakı şəhəri, Y.Səfərov küçəsi, 20 ünvanında müsabiqənin tələbləri, sərmayə planı ilə tanış ola və əlavə məlumat ala bilərlər. Sənədlər və təkliflər 27 fevralın 27 - də saat 10:00 -17:30 - dək qəbul olunur.
Təkliflərə 2009 - cu il yanvarın 29 - da saat 10:30 - dan etibarən müsabiqə komissiyası tərəfindən Dövlət Əmlakının İdarə Edilməsi üzrə Dövlət Komitəsinin binasında baxılacaq.
Dekabrın 20 - nə olan cari mübadilə məzənnəsi -- 0,8013 AZN/USD.
Müəlliflə əlaqə saxlamaq üçün elektron ünvan: [email protected]