Qazaxıstan, Astana, 30 yanvar/ Trend , müxbir K.Konırova/
2008 - ci ildə yerlərdə daxil olan ekoloji ödənişlərin mənimsənilməsi yaxşı vəziyyətdə deyil, - cümə günü Qazaxıstanın Baş naziri Kərim Məsimovun iştirakı ilə Ətraf Mühitin Mühafizəsi Nazirliyinin kollegiya iclasında çıxış edən Idarə rəhbəri Nurlan İskakov bildirib.
"2008 - ci ildə yerli büdcələrə 66 milyard təngə ekoloji ödəniş daxil olub. Və yalnız bu vəsaitlərin 30 faizi təbiətin mühafizəsi məqsədlərinə yönəldilib", - İskakov deyib.
Onun məlumatına görə, ekoloji probemlərin daha çox cəmləşdiyi qərb regionlarında büdcəyə daxil olan ekoloji ödənişlərin yalnız 3,7 faizi ekologiyaya sərf olunur.
Kollegiyada iştirak edən parlamentin Ekologiya və təbiətdən istifadə məsələləri üzrə Komitəsinin sədri Yerlan Niqmatullin bununla əlaqədar Ətraf Mühitin Mühafizəsi Nazirliyinə ekoloji ödənişləri ekoloji vergilərlə əvəzləməyi təklif edib.
Deputatın rəyinə görə, belə yanaşma daha səmərəli olacaq.
"Ekoloji ödənişlər çirklənmiş torpaq, su və s. görə ödəniş kimi nəzərdən keçirilir. Lakin bu vəziyyətin yaxşılaşmasını stimullaşdırmır. Məhz buna görə də, hesab edirəm ki, ekoloji vergilər daha işlək alət olacaq", - Niqmatullin deyib.
Müəlliflə əlaqə saxlamaq üçün elektron ünvan: [email protected]