...

Moskva Azərbaycan müəssisələrini tibbi texnika istehsalına cəlb etmək istəyir

Biznes və iqtisadiyyat xəbərləri Materials 12 Mart 2009 13:03 (UTC +04:00)

Trend-i buradan izləyin

Rusiya, Moskva, 12 mart / Trend , R.Ağayev /

Azərbaycanın Baş nazirinin müavini Eyyub Yaqubov və Moskva merinin müavini Lyudmila Şvetsova dünən Rusiya paytaxtında iqtisadi-ticari, elmi-texniki və mədəniyyət sahələrində əməkdaşlıq üzrə Azərbaycan-Moskva hökumətlərarası komissiyasının iclasının yekunlarına əsasən protokol imzalayıblar.

"Komissiya qeyd edir ki, 2007-ci ilin oktyabrında baş tutmuş ötən iclasın protokolunda nəzərdə tutulmuş bütün tapşırıqlar əsasən yerinə yetirilib", - protokolun mətnində deyilir.

Protokolda deyilir ki, 2007-ci ildə Azərbaycanla Moskva arasında ticarət dövriyyəsi 131 milyon dollara bərabər olub ki, bu da 2006-cı ilin göstəricisindən 1,9 dəfə çoxdur. 2008-ci ilin yanvar-sentyabr aylarında ticarət dövriyyəsi 157,1 milyon dollar təşkil edib. Moskvadan Azərbaycana 133,7 milyon dollarlıq mal tədarük olunubsa, əks istiqamətdə tədarük edilən malların dəyəri 23,4 milyon dollara bərabər olub.

"Moskvadan ixracın artımı Azərbaycana innovasiya texnologiyaları, qara metal məmulatları və ağır maşınqayırma məhsulları üzrə tədarükün böyük dərəcədə artımı ilə əlaqədardır", - protokolun mətnində bildirilib. Moskvadan Azərbaycana həmçinin elektrik avadanlığı, avtonəqliyyat, ət-süd və balıq məhsulları, qənd və konditer məmulatları, kimyəvi məhsullar tədarük edilir.

Rusiya Federal gömrük xidmətinin məlumatına görə, 2008-ci ilin ilk yarısında Azərbaycandan Moskvaya 6 min ton kənd təsərrüfatı məhsulu, 69 min dekalitr spirtli içki tədarük olunub ki, bu da bütün MDB-dən gətirilən məhsulların 6,4 faizi deməkdir.

Hökumətlərarası komissiyanın iclasının yekunlarına əsasən, Moskva şəhərinin elm və sənaye siyasəti departamenti və Rusiya Enerji və Sənaye Nazirliyinə sənaye və aqrar-sənaye kompleksi və iqtisadiyyatın digər sahələri müəssisələrinin əməkdaşlığı üzrə konkret tapşırıqları işləmək, eləcə də külək enerji qurğularının yaradılması layihələrinin inkişaf etdirilməsi, işlənmiş təkərlərin emalı və Moskva müəssisələrinin avadanlıqlarının kiçik hidrostansiyalarda istifadə olunması üzrə işlər tapşırılıb.

Bununla yanaşı, bu strukturlara kooperativ əsasda tibbi texnika və tibbi təyinatlı məmulatların istehsalı üzrə birgə müəssisələrin yaradılmasında Azərbaycan müəssisələrinin iştirakının mümkünlüyünü nəzərdən keçirmək tapşırılıb.

Komissiyanın səkkizinci iclasının Bakıda keçirilməsi barədə qərar qəbul edilib, konkret vaxt dəqiqləşdiriləcək.

Məqalə müəllifi ilə əlaqə ünvanı: с[email protected]

Xəbər lenti

Xəbər lenti