Azərbaycan, Bakı, 23 iyun / Trend , müxbir A.Bədəlova /
Azərbaycan iqtisadiyyatının demək olar ki, bütün sferalarında keçirilən islahatlar, o cümlədən son üç ildə iqtisadi artımın tempi Azərbaycanı dünyada sürətlə inkişaf edən ölkələrdən birinə çevirib. Bu barədə çərşənbə axşamı "Avropa sosial xartiyası" seminarında əmək və əhalinin sosial müdafiəsi nazirinin müavini İlqar Rəhimov bildirib.
"Sosial-iqtisadi hüquqların müdafiəsi və gücləndirilməsi insan hüquqlarının vacib komponenti, o cümlədən ölkəmizin inkişafını şərtləndirən göstəricidir", - Rəhimov deyib.
Onun sözlərinə görə, Azərbaycan son ildə biznez mühitinin yaxşılaşdırılması üzrə islahatların keçirilməsi sferasında dünyanın 181 ölkəsi arasında 97-dən 33-cü yerə yüksəlib.
Rəhimovun bildirdiyinə görə, seminarın əsas məqsədi Azərbaycanın Avropa Sosial Xartiyasında qəbul etmədiyi maddələrin müzakirəsi, o cümlədən ölkənin son beş ildə sosial-iqtisadi inkişaf prosesinin nəticələrinə uyğun olaraq onların gələcəkdə ratifikasiya imkanlarının öyrənilməsidir.
Azərbaycan 2004-cü ilin yanvarında Avropa Sosial Xartiyasında nəzərdə tutulmuş 18 maddəni ratifikasiya edib.
"Azərbaycan Avropa standartlarına uyğun islahatların keçirilməsi və sosial-iqtisadi hüquqların təmin edilməsi baxımından Avropa Şurası ilə əməkdaşlığa böyük önəm verir", - Rəhimov deyib.
Məqalə müəllifi ilə əlaqə ünvanı: [email protected]
