Azərbaycan, Bakı, 14 avqust / Trend , müxbir E.İsmayılov /
Rusiya ərazisində Bakı-Rostov dəmiryolunda partlayış təhlükəsi səbəbindən dayandırılan qatarlardan biri Bakıya doğru hərəkətini davam etdirib. Bu barədə cümə günü "Azərbaycan Dəmir Yolları" QSC-nin mətbuat xidmətinin başçısı Nadir Əzməmmədov bildirib.
"Qatarlardan biri, daha dəqiq desək, Tümən-Bakı qatarı artıq Bakı istiqamətində hərəkətə başlayıb. Onun Bakıya beş saat gec gəlməsi gözlənilir (Bakı vaxtı ilə)", - Əzməmmədov bildirib.
"Qatar Bakıda yerli vaxtla saat 17:10-da olmalıdır", - Əzməmmədov deyib.
İkinci Bakı-Tümən istiqamətindəki qatar hələ də Dağıstan ərazisindədir, lakin yaxın vaxtlarda onun da göndərilməsi gözlənilir. Hər iki qatar Dağıstanın Mahaçqala şəhəri yaxınlığında təhlükəsiz yerdə saxlanılırdı.
Əvvəlcə Rusiya KİV bildirmişdi ki, Rusiyanın xüsusi xidmət orqanları Rostov-Bakı dəmiryol magistralı sahəsinin minalardan təmizlənməsi üzrə işlər həyata keçirib.
Bu qatarların sərnişinlərinin təhlükəsizliyi təmin edilib və Rusiya tərəfindən onlara ərzaq payı verilib.
Məqalə müəllifi ilə əlaqə ünvanı: [email protected]
