Azərbaycan, Bakı, 20 avqust / Trend , müxbir Ü.İsmayılova /
Azərbaycan Sahibkarlar Konfederasiyası və İranın Ticarət və Sənaye Palatası əməkdaşlıq haqqında memorandum imzalayıblar, bu barədə konfederasiyadan cümə axşamı bildirilib.
Qarşılıqlı əməkdaşlıq haqqında memorandum İran nümayəndə heyətinin İran Palatasının rəhbəri Məhəmməd Nəhavəndianın başçılığı altında Azərbaycana səfəri zamanı imzalanıb.
"Görüşün əsas məqsədi İran və Azərbaycan sahibkarları arasında işgüzar münasibətlərin yaxşılaşdırılmasıdır", - konfederasiyadan bildirilib.
Görüş zamanı qeyd olunub ki, hər iki ölkənin sahibkarları qarşılıqlı əməkdaşlığı genişləndirmək üçün kifayət qədər potensiala malikdir və bu münasibətlərin intensivliyinin və səmərəliliyinin artırılması üçün bir sıra tədbirlər həyata keçirmək lazımdır.
Azərbaycanın Dövlət Statistika Komitəsinin məlumatına əsasən, yanvar-iyul aylarında Azərbaycan və İran arasında əmtəə dövriyəsi 70,48 milyon dollar təşkil edib ki, bunun da 35,75 milyon dolları idxalın, 34,72 milyon dolları isı ixracın payına düşüb.
