Azərbaycan, Bakı, 03 oktyabr / Trend , müxbir İ.Xəlilova/
Azərbaycan Mərkəzi Bankının (AMB) İdarə Heyətinin sədri Elman Rüstəmov yaxın günlərdə bankın ölkədə reallaşdırmasını planlaşdırdığı proqramlar üzrə əməkdaşlığın perspektivlərini müzakirə etmək üçün Dünya Bankının (DB) Cənubi Qafqaz üzrə regional direktoru Əsəd Aləmlə görüşüb.
AMB-dən verilən məlumata görə, görüşdə Azərbaycanda bank portfelinin effektivliyinin birgə qiymətləndirilməsinin nəticələri, DB rərəfindən maliyyələşdirilən layihə və proqramlar da nəzərdən keçirilib.
"Bu gün kifayət qədər böyük layihələr təsdiq olunub, amma onların həyata keçirilmə səviyyəsi çox aşağıdır", - bu yaxınlarda bankın Bakı nümayəndəliyinin rəhbəri Qriqori Yedceyçak deyib.
Azərbaycanda Beynəlxalq İnkişaf Assosiasiyasının (BİA) xətti ilə maliyyələşən ölkə kimi ümumdaxili məhsulunun həcminin artırmasına baxmayaraq, növbəti maliyyə ilində də DB tərəfindən güzəştli kreditlərin verilməsi istisna olunmur.
Yedceyçak deyib ki, Azərbaycanda iqtisadiyyatın elə sahələri var ki, dövlət onların inkişafı üçün DB-dən yüngül şərtli kreditlər ala bilər. Amma bu barədə danışmaq hələ tezdir.
Əvvəllər DB vəsaitin Afrika ölkələri kimi daha kasıb ölkələrə yönəldilməsi məqsədi ilə 2009-cu ildən Azərbaycanın BİA xətti ilə güzətli şərtlərlə maliyyələşdirilməsinin dayandırılacağını bildirsə də, ölkəyə 70 milyon dollar vəsait ayırdı. Bank gələn il də Azərbaycana güzəştli kreditlər ayıracaq.
2008-ci maliyyə ilində ölkə rəhbərliyi DB-dən korporativ və dövlət sektorundakı layihələrin həyata keçirilməsi, təhsil sahəsində islahatların üçüncü fazasının işə salınması, su və kanalizasiya sisteminin inkişafı, məcburi köçkünlərin sosial şəraitinin yaxşılaşdırılması və kənd təsərrüfatı sahələrinin inkişaf etdirilməsi üçün altı güzətli kredit ala bilib. Bütün bunların həyata keçirilməsi üçün 121 milyon dollar vəsait ayrılıb.
2009-cu maliyyə ilində bank Azərbaycana Hacıqabul-Bəhramtəpə avtomobil yolunun tikilişi və rekonstruksiyasına, həmçinin böyük infrastruktur layihələri həyata keçirən dövlət idarələri əməkdaşlarının potensialının artırılması layihəsinə 183 milyon dollar həcmində kredit ayıracaq.
Azərbaycan 1992-ci ildən DB-nin üzvüdür. Bankla əməkdaşlıq ərzində ölkəyə 2,5 milyard həcmində kredit ayrılıb.
Məqalə müəllifi ilə əlaqə ünvanı: [email protected]
