Azərbaycan, Bakı, 25 yanvar / Trend , müxbir N.İsmayılova/
Türkiyənin Maan Guarantee Holding Şirkətlər Qrupu (o cümlədən Maan Guarantee Consortium, Holding Bank Group və Fund Bank Group) 2010-cu ildə Azərbaycan, Rusiya, Türkiyə və Qazaxıstanın bank bazarlarının tədqiqatına başlayıb. Bu barədə holdinqin məlumatında deyilir.
Məlumata görə, ilin birinci yarısında lazımi icazələr və razılıqların alınmasından sonra müvafiq qərarın qəbul ediləcəyi gözlənilir. Maan Guarantee Consortium və Maan Guarantee Holding bu layihələrə 54 milyard dollar vəsait yatıracaqlar. Bankların nəzarət paketlərinin alınması, şirkətlərin alınması, investisiyaların qoyulması konsorsiumun planına daxildir.
Əvvəllər Maan Guarantee Holding Azərbaycanın Birlik Bankının və "Azİnvest Sığorta" ASC sığorta şirkətinin səhmlərinin 40%-ni almağa maraqlı olduğunu bildirmişdi. Lakin danışıqlar holdinqin şərtləri ilə razılıq əldə edilmədiyi üçün müvəqqəti dayandırılmışdı.
Hazırda bank və holdinq danışıqlar prosesindədir. Danışıqlar holdinq rəhbərliyinin Azərbaycana səfəri zamanı davam edəcək.
Hazırda bankın 20 səhmdarı (fiziki şəxslər) var. Bununla yanaşı, bankın 35,08% səhmləri "Azİnvest Sığorta" (şirkət əvvəllər "Nişan Sığorta" adlanırdı) şirkətinə məxsusdur. Öz növbəsində bankın sığorta şirkətindəki iştirak payı 15% təşkil edir.