Azərbaycan, Bakı, 14 iyul /Trend, müxbir Ü.İsmayılova/
Azərbaycan Maliyyə Nazirliyi 10 aparıcı sığorta şirkətinin yanvar-iyun ayları ərzində fəaliyyət yekunlarını açıqlayıb. Sığorta yığımlarının ümumi həcminin 78,8 faizi və ümumi ödəmələrin 82,44 faizi həmin 10 sığorta şirkətinin payına düşüb. Azərbaycanda ümumilikdə 27 sığorta (lisenziya müddəti müvəqqəti dayandırılan "Günay Sığorta" sığorta şirkəti hesaba alınmır) və bir təkrar sığorta şirkəti fəaliyyət göstərir.
|
Sığorta yığımları və ödəmələri üzrə reytinqə "Azərsığorta" SŞ liderlik edir, halbuki sığorta haqlarının yığımı üzrə indiyədək "Azal Sığorta" lider olub. "Azal Sığorta"nın liderliyi itirməsi onun lisenziya müddətinin müvəqqəti dayandırılması ilə bağlıdır. Nəticədə şirkət yeni sığorta müqavilələri bağlamaq hüququnu itirib. Bu gün şikrkət artıq sığorta fəaliyyəti üzrə lisenziyasını bərpa edib.
Ölkədə fəaliyyət göstərən bütün sığorta şirkətlərinin hesabat dövründə ümumi haqlarının həcmi 76,88 milyon manat təşkil edib, 22,49 milyon manatlıq ödəmələr həyata keçirilib. İl ərzində ümumi sığorta haqlarının həcmi 3,76 faiz (79,89 milyon manat), ödəmələr isə 8,76 faiz (24,56 milyon manat) azalıb.
Azərbaycan Maliyyə Nazirliyinin yanvar-iyun ayları üzrə hesabatında yeganə təkrar sığorta şirkəti olan "Az RE Təkrar Sığorta"nın fəaliyyət yekunları göstərilməyib.
İyulun 14-nə olan rəsmi məzənnə 0,8037 AZN/USD təşkil edir.