Azərbaycan, Bakı, 5 avqust /Trend, müxbir S.Süleymanov/
Azərbaycan Qazaxıstan taxılının yüksək keyfiyyətli olması səbəbindən ona üstünlük verir. Bu barədə cümə axşamı "Prodkorporasiya" (Qazaxıstan) SC-nin ticari məsələlər üzrə icraçı direktoru Daulet Uvaşev bildirib.
"Azərbaycan hökuməti hələ ötən ilin payızından dövlət taxıl fondunun yalnız yüksək keyfiyyətli taxılla doldurulması haqqında qərar qəbul edib. Yoxlamaların nəticələrinə əsasən, bu tələblərə yalnız Qazaxıstan taxılı cavab verib", - Uvaşev Qazaxıstan taxılının Azərbaycana tədarükü həcminin iki dəfə artırılması ilə bağlı suala cavabında deyib.
O xatırladıb ki, Qazaxıstanın kəskin kontinental iqlimi sayəsində respublikada becərilən taxılın tərkibində 20 faizdən 30 faizədək öz (taxılın tərkibində olub xəmirə yapışqanlıq xassəsi verən zülallı maddə - red.) var.
"Azərbaycanın müvafiq xidmətləri tərəfindən ənənəvi taxıl tədarükçülərinin, o cümlədən Rusiya tədarükçülərinin taxılı yoxlanıldıqdan sonra üstünlük son nəticədə Qazaxıstan taxılına verilib", - Uvaşev qeyd edib.
Qazaxıstan Kənd Təsərrüfatı Nazirliyinin mətbuat xidmətinin məlumatına əsasən, ilin birinci yarısında Azərbaycana Qazaxıstan taxılının tədarükü həcmi 547,8 min ton təşkil edib ki, bu da ötən il tədarük edilən həcmdən (256,6 min ton) təxminən iki dəfə çoxdur.
