Azərbaycan, Bakı, 17 avqust /Trend, müxbir İ.Xəlilova /
Azərbaycan İnvestisiya Şirkəti (AİŞ) və Özəl Sektorun İnkişafı İslam Korporasiyasının (ICD) yaratdığı Xəzər Beynəlxalq İnvestisiya Şirkəti (CIIC) 2010-cu ildə nizamnamə kapitalının artırılmasını planlaşdırmır. Bu gün şirkətin nizamnamə kapitalı 31 milyon manat səviyyəsindədir. Bu barədə CIIC-in icraçı-direktoru Toğrul Köçərli çərşənbə axşamı məlumat verib [hələ 2009-cu ilin sonlarınadək kapitalı 55 milyon manatadək çatdırmaq planlaşdıırlmışdı].
"CIIC səhmdarlarının qərarına görə, şirkətin kapitallaşdırılması mərhələli şəkildə həyata keçiriləcək və kapitalın əlavə artırılması məsələsinə əldə olan vəsaitlərin uğurla yerləşdiriləcəyi halda baxılacaq", - Köçərli bildirib.
Onun sözlərinə görə, bu gün CIIC-nin vəsaitlərindən üç layihənin reallaşdırılması üçün 13,4 milyon manat yönəldilib. Hazırda şirkət logistika, istixanaların yaradılması və s. üzrə layihələrə baxır.
Bəyənilən layihələrdən birincisinə Samuxda 25 min ton gücündə soyuducu anbar kompleksinin tikintisi daxildir. CIIC və "N.A.A. Agrotara" MMC arasında investisiyalaşdırma barədə saziş ötən ilin iyununda imzalanıb. Bu layihədə şirkətin investisiyalarının ümumi həcmi 5,5 milyon manat təşkil edir.
Şirkətin ikinci layihəsi Bakıdan 18 km aralıda yerləşən Saray qəsəbəsində 169 villanın tikintisini əhatə edir. CIIC bu layihənin maliyyələşdirilməsi üçün 6,4 milyon manat hesablayıb ki, bu da onun ümumi dəyərinin 20 faizi qədərdir. Layihəyə görə, kompleksdə uşaq bağçasının, idman-əyləncə mərkəzinin tikintisi də nəzərdə tutulub. Layihənin 2011-ci ilin birinci rübündə tam başa çatacağı gözlənilir.
Üçüncü layihə ölkədə aqrobiznesin və kənd təsərrüfatı sektorunun inkişafına yönəlib. Layihə ölkədə ən iri kahı istehsalçısı olan "Aqroyurd"un maliyyələşdirilməsini, onun iştirakı ilə birgə müəssisənin yaradılmasını nəzərdə tutur. Layihə çərçivəsində müasir tələblərə cavab verən istixanalar tikiləcək və başqa bitkilərin də becərilməsinə başlanması mümkündür. CIIC layihənin ümumi dəyərinin 68 faizini maliyyələşdirir ki, bu da 1,5 milyon manat təşkil edir.
"Caspian International Investment Company" 2008-ci ilin martında 2,954 milyon manatlıq ilkin kapitalla QSC kimi qeydiyyatdan keçib. AİŞ-in iştirak payı 25, ICD-nin iştirak payı isə 75 faiz təşkil edib. Bu gün şirkətin nizamnamə kapitalı genişlənib. Şirkətin xarici investorlarına Küveytin İnvestisiya Şirkəti "Hares Group", Yəmənin İnvestisiya Şirkəti "Al Ahmar Group", Sudanın "MAM Group" şikəti, Dubayın "TANMIYAT Group" şirkəti, eləcə də İslam İnkişaf Bankı aiddir. CIIC-in kapitalında xarici səhmdarların iştirak payı 23 milyon manatı ötür.
Strategiyaya əsasən, CIIC-ın investisiyaları şəriət qaydalarına zidd olan spirtli içkilər və donuz əti məhsullarının istehsalı üzrə müəssisələr istisna olmaqla, iqtisadiyyatın real sektoruna, həmçinin, maliyyələşdirmə və sığorta xidmətlərinin göstərilməsində standart şərtlərlə fəaliyyət göstərən bank və sığorta təşkilatlarına qoyulacaq.
Avqustun 17-nə rəsmi məzənnə 0,8038 AZN/USD təşkil edir.
