Azərbaycan, Bakı, 18 avqust /Trend, müxbir N.İsmayılova/
Yanvar-iyun aylarında Rusiya və Azərbaycan arasında mal dövriyyəsi 2009-cu ilin müvafiq dövrünə nisbətdə 17 faiz artaraq 848,6 milyon dollar təşkil edib. Bu barədə çərşənbə günü mətbuat konfransında Rusiyanın Azərbaycandakı ticarət nümayəndəsi Yuri Şedrin deyib.
"Rusiyaya ixrac 44,4 faiz artaraq 360,4 milyon dollar, Rusiyadan idxal isə 2,7 faiz artaraq 488,2 milyon dollar olub", - Şedrin bildirib.
Onun sözlərinə görə, 2010-cu ilin yekunlarına görə, iki ölkə arasında proqnozlaşdırılan mal dövriyyəsinin artımı 11 faiz təşkil edir və optimist qiymətləndirməyə görə, iki milyard dollar mal dövriyyəsinə çıxmaq imkanı var.
"Rusiya-Azərbaycan ticari-iqtisadi əlaqələrinin strukturu kifayət qədər diversifikasiya edilərək qalmaqdadır, Rusiya idxalının 90 faizindən çoxunu dərin emal məhsulu təşkil edir", - o qeyd edib.
Rusiyanın əsas ixrac malları buğda, buğda unu, siqaret, yağ, şokolad, çörək-bulka və un məmulatları, nəqliyyat vasitələri, elektrik enerjisi, meşə materialları, kağız, mineral gübrələrdir.
"Rusiyanın metal və onlardan düzəldilən mallarının ixracı ötən ilin müvafiq dövrünə nisbətdə 54 faiz artımla 103 milyon dollara çatıb", - o vurğulayıb.
Azərbaycanın Rusiyaya ixrac strukturunda ərzaq malları və kənd təsərrüfatı xammalı üstünlük təşkil edir. Onların xüsusi çəkisi 47 faizdir.