Azərbaycan, Bakı, 25 sentyabr /Trend, müxbir А.Axundov/
Avqustda "Əmlak Bazarı İştirakçıları" İctimai Birliyi ekspertlərinin apardığı monitorinqlərə əsasən, Bakının avtomobil bazarında mövsüm üçün xarakterik passivlik müşahidə edilib. Bu barədə birlikdən verilən məlumatda deyilir.
"Son 4 ay ərzində müşahidə olunan passiv tendensiyanın təklifin artımı hesabına daha da dərinləşməsi bazarın aktivliyi və qiymətlərə mənfi təsir göstərib", - məlumatda deyilir.
Avqust ayında avtomobil bazarında ili köhnə olan avtomobillərin hesabına təklifin kəskin artımı (19,6%) müşahidə olunub.Təklifin tələbi üstələmə tendensiyası avqust ayında bir qədər də dərinləşib. Ay ərzində satış mərkəzlərinə müraciət edənlərin sayında ötən ayla müqayisədə azalma qeydə alınıb. Bu, avtomobillərin alış-satış həcminin azalmasına (-1.4%), təsir göstərib. Avqustda bazarda orta qiymət ötən ayla müqayisədə 1,1% azalıb və orta qiymət 15 150 dollardan 14 985 dollara enib.
Bazarda müşahidə olunan passivlik avqust ayında avtomobillərin ekspozisiya müddətinin artmasına səbəb olub. Ekspozisiya müddətinin аrtması, eyni zamanda, əmlakın bu növü üzrə dövlət tərəfindən qəbul edilən bəzi qərarlar bir əmlak növü kimi avtomobilə olan marağın azalmasına səbəb olub, bu isə əmlakın bu növü üzrə risk dərəcəsini artırıb. Avtomobillərin likvidlik əmsalı son 3 illə müqayisədə ən aşağı həddə düşüb.
Ay ərzində təkrar avtomobil bazarında araşdırma predmeti olan 8 900-dan artıq avtomobilin cəmi 27,9%-i bazara avqust ayı ərzində təklif olunub. Qalan 72,1%-i isə əvvəlki aylardan qalan avtomobillərdir. Bu isə idxalın azalması ilə yanaşı, alıcılıq qabiliyyətinin aşağı düşməsi və dinamikanın kəskin azalması ilə əlaqələndirilir. Əvvəlki 4 ay ərzində köhnə avtomobillərin bazara kütləvi axın tendensiyası avqust ayında bir qədər də kəskin hal alıb və avqust ayında bazarda ən yüksək təklif əmsalı qeydə alınıb.
Üç ildən artıqdır ki, təkrar bazarda liderliyi böyük fərqlə əldə saxlayan maşın alman markası "Mersedes-Benz"in təklif üzrə payı əvvəlki ayla müqayisədə 14,3% artıb; bu markanın ümumi portfeldə payı 35,5% təşkil edib. Ümumilikdə, ay ərzində ümumi təklif portfelini formalaşdıran 9 markanın hamısı üzrə təklif artımı qeydə alınıb. Təklif üzrə ən çox artım istismarda olmuş Rusiya istehsallı avtomobillər üzrə (59,5%) qeydə alınıb. Buna baxmayaraq, araşdırmalar göstərir ki, ötən aylarda olduğu kimi, "Mersedes-Benz" ümumi təklif portfelində digər rəqiblərini böyük fərqlə geridə qoyur.
Ümumilikdə, 9 markanın təklif üzrə payı 84,6% təşkil edib. Yerdə qalan 15,4% isə 20-dən artıq şirkətin istehsalı olan 85-ə yaxın avtomarka arasında bölünür.