Azərbaycan, Bakı, 13 dekabr /Trend, müxbir Ü.İsmayılova/
Kapitalı Azərbaycanın Maliyyə Nazirliyinin mimimum tələblərinə uyğun gəlməyən sığorta şirkətləri bazarda yaşamaq üçün birləşməlidirlər. "Alfa Sigorta" şirkətinin Direktorlar Şurasının sədri Xəyal Məmmədxanlı belə hesab edir.
"Sığorta şirkətlərinin birləşməsi praktikası bütün dünyada mövcuddur. Düşünürəm ki, bu prinsip Azərbaycan bazarında da uğurlu olar", - Məmmədxanlı deyib.
Onun sözlərinə görə, belə şirkətlər ölkənin sığorta bazarında öz fəaliyyətlərini portfel və müştərilərinin mübadiləsi yolu ilə davam etdirə bilərlər.
Azərbaycanın Maliyyə Nazirliyinin mimimum kapital tələblərinin azaldılması haqqında son qərarına toxunan Məmmədxanlı deyib ki, bu, ağır postböhran dövründən sonra sığorta şirkətlərinin vəziyyətinin yaxşılaşdırılması üçün yaxşı addımdır.
"Sığortaçıların kapitallaşma tələblərinin yumşaldılması hazırkı vəziyyətdə həm ayrı-ayrı sığorta şirkətləri, həm də ümumilikdə ölkənin sığorta bazarının inkişafı üçün əlavə dəstək olacaq", - Məmmədxanlı hesab edir.
Azərbaycan Maliyyə Nazirliyi sığorta və təkrar sığorta şirkətlərinin kapitallaşmasına olan minimum tələblərə dəyişikliklər edib. Dəyişikliklərə uyğun olaraq, minimum tələb 2011-ci il yanvarın 1-dən üç milyon manat (bundan əvvəl 3,5 milyon manat idi), 2012-ci il yanvarın 1-dən dörd milyon manat (5 milyon manat) səviyəsində təmin edilməlidir.
Kapitallaşmanın qrafikinin dəyişdirilməsi barədə qərar qəbul olunan zaman dünya maliyyə böhranının sığorta və təkrar sığorta şirkətlərinin maliyyə vəziyyətlərinə təsiri nəzərə alınıb.
Azərbaycanda 27 sığorta və 1 təkrar sığorta şirkəti fəaliyyət göstərir.
Dekabrın 13-nə rəsmi məzənnə 0,7991 AZN/USD təşkil edir.