Аzərbaycan, Bakı, 31 yanvar /Trend, müxbir İ.Xəlilova/
Azərbaycan hökuməti ilə Beynəlxalq Valyuta Fondu (BVF) sazişinin IV maddəsi üzrə məsləhətləşmələrin aparılması üçün fondun missiyası fevralın 7-dən 15-dək Azərbaycanda işləyəcək. Bu barədə bazar ertəsi Azərbaycan hökumətindən bildirilib. Məsləhətləşmələr hər il aparılır.
"Səfər zamanı IV maddənin porioritet istiqamətləri ilə yanaşı ölkədəki makroiqtisadi vəziyyət (cari vəziyyət və perspektivlər), valyuta fondunun texniki yardımının alınması üçün istiqamətlərin müzakirə edilməsi planlaşdırılır", - hökumətdən deyiblər.
Missiyanın səfəri zamanı Maliyyə, İqtisadi İnkişaf nazirliklərində, Mərkəzi Bankda, Dövlət Sosial Müdafiə Fondunda, Dövlət Statistika Komitəsində, Dövlət Gömrük Komitəsində , Qiymətli Kağızlar üzrə Dövlət Komitəsində, ARDNŞ-də, ölkə Parlamentində, beynəlxalq təşkilatların - DB, AYİB, BMK, Deloitte - nümayəndəliklərində görüşlərin keçirilməsi planlaşdırılıb. Eləcə də donorlarla, QHT-lər, yerli banklarda - Azərbaycan Beynəlxalq Bankında, Kapital Bank və Yapi Kredi Bankda, Amerikanın Azərbaycandakı Ticarət Palatasında (AMCHAM) da görüşlərin keçirilməsi nəzərdə tutulub.
Azərbaycan hökuməti artıq altı ildir IV maddə çərçivəsində məsləhətləşmələr səviyyəsində BVF ilə əməkdaşlıq həyata keçirir. Ona görə də səfər zamanı proqram əsasında əməkdaşlığın perspektivlərinə praktiki olaraq toxunulmur.
Hazırda ölkənin fonddan borc alınmasını bərpa etməsi üçün səbəb yoxdur. Belə ki, Azərbaycan qlobal maliyyə böhranı şəraitində belə yardım üçün BVF-yə müraciət etməyib. Bununla əlaqədar, BVF 2009-cu ildə fondun Azərbaycandakı nümayəndəliyinin başçısını geri çağırmaq və ofisin ölkədəki ştatını ixtisara salmaq barədə qərar qəbul edib. BVF-nin Bakı ofisi Mərkəzi Asiya və Qafqaz üzrə regional nümayəndəlik tərəfindən idarə olunur.
Fond Azərbaycandakı nümayəndəlik üzrə xərclərin azaldılması haqqında qərarı onunla əsaslandırır ki, Azərbaycanın fondun kredit resurslarına ehtiyacı yoxdur, çünki ölkənin ödəniş balansında kifayət qədər böyük müsbət saldo mövcuddur. Ona görə də fondun qənaət olunmuş vəsaitləri bu gün BVF-dən iri məbləğdə kreditlər alan ölkələrə göndərilir. Hazırda Azərbaycanda BVF-nin ofisi fəaliyyət göstərir.
BVF-nin Azərbaycandakı daimi nümayəndəliyi 1993-cü ildən fəaliyyət göstərir, hökumətlə əməkdaşlığa isə 1992-ci ildən başlanılıb. Beynəlxalq təşkilat ölkəni 1995-ci ildən kreditləşdirməyə başlayıb. Bu günədək BVF respublikaya altı proqram çərçivəsində kredit ayırıb. Azərbaycan 2013-cü ilədək əvvəllər fonddan götürülən kreditlərin ödənilməsini davam etdirəcək.