Azərbaycan, Bakı, 17 fevral /Trend, müxbir N.İsmayılova/
2011-ci ildə Azərbaycan EQMONT klubuna üzv olmağı planlaşdırır. Bu barədə cümə axşamı Azərbaycan Mərkəzi Bankı nəzdində Maliyyə Monitorinqi Xidmətinin rəhbəri Adışirin Qasımov deyib.
EQMONT qrupu maliyyə münasibətləri sahəsində İnterpol tipli təşkilatdır (qrupun "Eqmont" təhlükəsiz şəbəkə" informasiya mərkəzi var). Bu təşkilatın 60-a yaxın üzvü şübhəli maliyyə əməliyyatları və cinayət yolu ilə əldə edilən gəlirlərin leqallaşdırılmasının üsulları haqqında informasiya mübadiləsi edirlər və birlikdə onların transsərhəd üzrə hərəkətinə qarşı mübarizə aparırlar.
"2010-cu ildən etibarən biz Beynəlxalq Maliyyə Kəşfiyyatı Qrupuna daxil olan bu kluba üzv olmaq üçün danışıqlara başlamışıq və bu il onun sıralarına qəbul ediləcəyimizi gözləyirik", - Qasımov qeyd edib.
Onun sözlərinə görə, Mərkəzi Bank nəzdində Maliyyə Monitorinqi Xidməti üçün beynəlxalq əməkdaşlığın genişləndirilməsi 2010-2013-cü illər üçün strategiya çərçivəsində də nəzərdə tutulub.
2002-ci ildən etibarən Azərbaycan Avropa Şurasının MONEYVAL Ekspertlər Komitəsinin, 2009-cu ildən isə İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) üzvüdür.
"Maliyyə Monitorinqi Xidməti 30 ölkə ilə beynəlxalq əməkdaşlıq qurub. Bu, Azərbaycanın beynəlxalq imicinin artmasına xidmət edib", - Qasımov bildirib.
İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupu (FATF) cinayət gəlirlərinin "əldə edilməsi" və terrorizmin maliyyələşməsi ilə mübarizədə kollektiv tədbirlərin hazırlanması və həyata keçirilməsi üçün yaradılan hökumətlərarası təşkilatdır. FATF 1989-cu ildə Parisdə keçirilən "Böyük səkkizlik" sammitinin qərarına uyğun olaraq yaradılıb. Hazırda FATF-a 34 iştirakçı daxildir. FATF 1990-cı ildə pul vəsaitlərinin yuyulması ilə mübarizə aparmaq üçün 40 tövsiyə hazırlayıb. 1996 və 2003-cü illərdə pulların silinməsi texnologiyasının inkişaf etməsi ilə əlaqədar onlara yenidən baxılıb.
Bundan başqa, FATF 2001-ci ildə terrorizmin maliyyələşdirilməsi ilə mübarizədə doqquz xüsusi tövsiyə də hazırlayıb. O, 2004-cü ilin oktyabrında dünyada dəyişmiş siyasi vəziyyətə uyğunlaşdırılıb. Bu sənədlər pulların silinməsi və terrorizmin maliyyələşməsinin qarşısının alınması üzrə beynəlxalq standartlar kimi qəbul edilib.
