Azərbaycan, Bakı, 25 fevral /Trend, müxbir N.İsmayılova/
Bu gün Azərbaycanın qızıl ehtiyatları 250 kiloqrama yaxındır. Bu barədə cümə günü jurnalistlərə ölkənin maliyyə naziri Samir Şərifov məlumat verib.
"Azərbaycanın qızıl ehtiyatları 250 kiloqrama yaxın təşkil edir və onların həcmi daim artmaqda davam edir. "Anglo Asian Mining" şirkəti ölkədə yataqların işlənməsi hüququna malikdir və dövlət hasil olunan qızılın müəyyən hissəsini alır", - o deyib.
Onun sözlərinə görə, yataqlardan hasil olunan qızıl təmizlənmək üçün İsveçrəyə göndərilir. Külçələr Azərbaycana gətirilir və hökumətin xüsusi hesabında saxlanılır.
"Biz 1000 kiloqramdan aşağı partiyada qızıl alırıq, ona görə dətəmizlənmək üçün lazımi həcmdə qızıl göndərildikdən sonra növbəti partiya alınacaq", - nazir deyib.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli məhsulun pay bölgüsü sazişi əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.
Ötən ilin dördüncü rübünün yekunları üzrə qızıl istehsalı 19555 unsiya olmaqla rekord səviyyəyə çatıb. Bunun sayəsində şirkət il ərzində 67267 unsiya qızıl istehsal edib ki, bu da proqnoz göstəricilərini 60 min unsiya üstələyir.
Dördüncü rüb ərzində qızıl satışı üzrə orta yuxarı qiymət bir unsiyaya görə 1371 dollar olub və ümumilikdə 17 420 unsiya qızıl satılıb. Ötən ilin yekunları üzrə qızıl satışının orta qiyməti 1241 dollar təşkil edib, il ərzində isə cəmi 57 398 unsiya qızıl satılıb.