Azərbaycan, Bakı, 19 aprel /Trend, müxbir A.Axundov/
Azərbaycanın "Ölkədən getmə, ölkəyə gəlmə və pasportlar haqqında" qanununa yeni dəyişikliklərin real nəticələrini növbəti turizm mövsümündə hiss etmək mümkün olacaq. Bu barədə Trend-ə çərşənbə axşamı Azərbaycan Turizm Assosiasiyasının rəhbəri Nahid Bağırov deyib.
2011-ci ilin "Turizm ili" elan edilməsi ilə əlaqədar Azərbaycana gələn turistlər üçün vizaların rəsmiləşdirilməsi qaydalarının sadələşdirilməsi məqsədilə aprelin əvvəlində Milli Məclis "Ölkədən getmə, ölkəyə gəlmə və pasportlar haqqında" qanuna bir sıra dəyişikliklər edib.
"İndi biz bu dəyişikliklərin təsdiq edilməsi üçün prezidentin fərmanını gözləyirik. İstənilən halda, onlardan real nəticəni biz növbəti mövsümdə əldə edəcəyik, belə ki, bu mövsümdə Azərbaycana gəlməyə hazırlaşan turistlərin çoxu artıq viza alıblar", - Bağırov bildirib.
Bu dəyişikliklərin əsas üstünlüyü ondan ibarətdir ki, belə vizalar həm teleqraf poçtu, həm də elektron qaydada rəsmiləşdirilə bilir. Vizanın verilməsindən imtina edildikdə, bunun əsaslandırılmış səbəbləri göstərilməlidir. Bu halda turistlərə gəliş-gediş üçün birdəfəlik vizalar verilə bilər, bu vizalar üzrə ölkədə qalma müddəti isə 30 gün səviyyəsində müəyyənləşdirilib.
"Azərbaycana gəlmək istəyən xarici turist viza alan zaman bəzi çətinliklərlə üzləşirdi və daha əlverişli variantı seçirdi. Bu, Azərbaycana turizm axınına mənfi təsir göstərirdi", - Bağırov qeyd edib.
Onun sözlərinə görə, builki turizm mövsümündə Azərbaycana xarici turistlərin axını 20-30 faiz səviyyəsində proqnozlaşdırılır.
"Gələn mövsümdə qanunvericiliyə dəyişikliklər işə düşdükdən sonra biz də təxminən 20-30 faizlik artımı proqnozlaşdırırıq", - Bağırov bildirib.
Bundan əvvəl Azərbaycan Turizm Assosiasiyası ölkənin turizm bazarının inkişafının stimullaşdırılması məqsədilə mövcud qanunvericiliyə düzəlişləri hazırlamaq üçün Mədəniyyət və Turizm Nazirliyinə bir sıra təkliflər göndərib.
Bağırovun bundan əvvəl dediyinə görə, assosiasiyanın təklifi başlıca olaraq, xarici turistlərə vizaların verilməsinin və vergi tutulmasının sadələşdirilməsidir.
Assosiasiyanın təklifləri arasında Bağırov bunları qeyd edib:
- Bələdçilər üçün Bakı şəhəri və Abşeron yarımadası haqqında vahid metodiki vəsaitlərin hazırlanması və təsdiqlənməsi;
- turizm şirkətləri, mehmanxanalar və restoranların əməkdaşlarının hazırlıq səviyyəsinin artırılması üçün ixtisaslaşdırılmış treninqlərin keçirilməsi;
- Azərbaycanın bütün sərhəd-buraxılış məntəqələrində turistlərə müvafiq xidmətlərin göstərilməsi üçün turizm şirkətlərinə və təşkilatlara yerlərin ayrılması;
- orta və kiçik turizm biznesinə dəstək göstərilməsi məqsədilə təyinatı üzrə güzəştli kreditlərin verilməsi;
- Azərbaycana turist axınının gücləndirilməsi üçün turist vizalarının verilməsinin sadələşdirilməsi üzrə təkliflərin hazırlanması;
- Turizm sahəsi işçiləri üçün ayrıca peşə gününü elan olunması və onların dövlət tərəfindən mükafatlandırılması üzrə təkliflərin hazırlanması;
- Azərbaycanın turizm regionlarına xarici ölkə səfirliklərinin nümayəndələri üçün infoturların təşkili;
- mehmanxanaların və mehmanxana tipli obyektlərin Azərbaycan üzrə soraq kitabçaları ilə təmin olunması və s.
Onun sözlərinə görə, təkliflər, həmçinin xarici ölkə vətəndaşlarının turizmin tarixi, dini, mədəni, kulinar və digər növləri üzrə məlumatlandırılmasına yönəldilmiş müxtəlif festivallar, sərgilər və digər tədbirlərin təşkili və təkmilləşdirilməsinə də aiddir.
