Azərbaycan, Bakı, 8 iyun /Trend, müxbir A.Axundov/
Azərbaycanda qiymətləndirmə fəaliyyətini təkmilləşdirmək üçün beynəlxalq təcrübədən istifadə etmək lazımdır. Bu barədə "Qiymətləndirmə fəaliyyətinin tənzimlənməsi. Müasir beynəlxalq təcrübə" beynəlxalq konfransı zamanı Milli Məclisin İqtisadi siyasət komitəsinin sədri Ziyad Səmədzadə deyib.
"Azad bazar iqtisadiyyatı şəraitində obyektiv qiymətləndirmə çətin vəzifədir. Azərbaycanda əmlakın effektiv qiymətləndirilməsi ciddi problemdir və onun həlli üçün beynəlxalq təcrübədən istifadəyə ehtiyac duyulur", - Səmədzadə qeyd edib.
Onun sözlərinə görə, düzgün olmayan qiymətləndirmə sosial gərginliyin yaranmasına və iqtisadi vəziyyətin yanlış başa düşülməsinə səbəb ola bilər.
"Biz qiymətləndirmə fəaliyyəti üçün səmərəli normativ baza yaratmalıyıq, beynəlxalq standartları tətbiq etməliyik", - Səmədzadə qeyd edib.
İyunun 9-da parlamentdə plenar dinləmələrdə "Qiymətləndirmə fəaliyyəti haqqında" qanuna əlavə və dəyişikliklər layihəsinin müzakirəsi davam edəcək.
Səmədzadənin sözlərinə görə, bundan başqa, "Sığortanın icbari növləri haqqında" qanun layihəsi hazırlanan zaman qarşıda duran vəzifələrdən biri əmlakın və ziyanın düzgün qiymətləndirilməsidir.
"Sığortanın icbari növləri haqqında" qanun layihəsi iyunun sonunda üçüncü oxunuşda müzakirə ediləcək.
"Qiymətləndirmə fəaliyyətinin tənzimlənməsi. Müasir beynəlxalq təcrübə" konfransı Beynəlxalq Maliyyə Korporasiyası (IFC) və Azərbaycan Qiymətləndiricilər Cəmiyyəti tərəfindən təşkil edilib.
Konfrans zamanı IFC-nin nümayəndəsi Viktor Mintsin dediyinə görə, qiymətləndirmə fəaliyyətinin inkişafı məsələsi Azərbaycanda prinsipaldır.
"Bugünədək IFC Azərbaycanda 343 milyon dollar investisiya yatırıb və sindikatlaşdırılmış kreditlər şəklində 104 milyon dollar verib. Biz qiymətləndirmə fəaliyyəti sahəsində qanunvericilik və standartların hazırlanmasında və qiymətləndiricilərin sertifikatlaşdırılması prosesində iştirak edirik", - Mints deyib.
Onun sözlərinə görə, effektiv qiymətləndirmə sistemi olmasa, ipoteka kreditləşməsi də inkişaf etməyəcək.
Azərbaycanda qiymətləndirmə fəaliyyəti 1995-ci ildə qəbul edilən "Qiymətləndirmə fəaliyyəti haqqında" qanunla tənzimlənir. Azərbaycan Qiymətləndiricilər Cəmiyyəti 1997-ci ildə qeydiyyatdan keçib. Bu, ölkə ərazisində fəaliyyət göstərən bütün qiymətləndiriciləri birləşdirən ictimai təşkilatdır.
