Azərbaycan, Bakı, 6 avqust /Trend, müxbir İ.Xəlilova/
2012-ci ilin sonuna Dünya Bankı (DB) Azərbaycan ilə qüvvədə olan əməkdaşlıq startegiyasının aralıq qiymətləndirilməsini aparmağı planlaşdırır. Startegiya 2011-14-cü illər üçün hesablanıb. Bu barədə DB-nin ölkədəki nümayəndəliyinin rəhbəri Cozef Ouen jurnalistlərlə görüşdə deyib.
"Strategiyanın qiymətləndirilməsi ona dəyişikliklərin edilməsinə ehtiyacın olub-olmaması məqsədilə aparılacaq, - Ouen bildirib. - Hazırda bizim strategiya ondan ibarətdir ki, layihələr həyata keçirilən zaman uğurlar qazanan sahələrə böyük diqqət yetirək, indiki layihələrin həyata keçirilməsini yaxşılaşdıraq. Lakin gələcəkdə əməkdaşlığın yeni istiqamətlərinin müəyyənləşdirilməsi imkanları istisna edilmir".
Strategiya qeyri-neft sektorunun möhkəmləndirilməsi, o cümlədən infrastrukturun və kənd təsərrüfatının inkişafı kimi prioritetlərə əsaslanır. Bundan başqa, bankın fəaliyyəti sosial xidmətlərin, o cümlədən səhiyyə, təhsil, sosial müdafiə və su təchizatı sistemlərinin səmərəliyinin gücləndirilməsinə yönələcək.
Yeni strategiya çərçivəsində ölkə hökuməti DB-yə strategiyanın 4 illik müddəti üçün ümumi məbləği 1 milyard dollara yaxın olan investisiyanın ayrılması xahişi ilə müraciət edib.
İlk iki ildə kreditləşmənin həcmi gözlənildiyinə görə, 380 milyon dollara yaxın olacaq. Bank 3 layihəni təsdiq edib. Onların həyat keçirilməsinə 125 milyon dollar ayırıb.
Azərbaycanda əhalinin adambaşına düşən 4820 dollar gəlir səviyyəsi nəzərə alınmaqla, 2011-ci il DB-dən güzəştli maliyyələşdirmənin son ili olacaq. Bu göstərici ölkənin iqtisadi rifahı ortagöstəricili ölkələr sırasına daxil edir. Beynəlxalq Maliyyə Korporasiyası (BMK) strategiyanın bütün müddəti ərzində ölkədə öz investisiya proqramını təxminən 200 milyon dollar artıracaq.
Azərbaycanın 1992-ci ildə Beynəlxalq Yenidənqurma və İnkişaf Bankına və 1995-ci ildə Beynəlxalq İnkişaf Assosiasiyasına qoşulmasından sonra Dünya Bankının Azərbaycan qarşısında öhdəlikləri 43 layihə üçün təxminən 2,9 milyard ABŞ dolları təşkil edib. Azərbaycanın 1995-ci ildə qoşulmasından sonra IFC-nin öhdəlikləri 45 layihə üçün demək olar ki, 350 milyon ABŞ dollar təşkil edir.
Hazırda bank ümumi dəyəri orta hesabla iki milyon dollar olan 20 layihəni maliyyələşdirir. Bu layihələr nəqliyyat, su və kanalizasiya sektorunu, kənd təsərrüfatı və irriqasiyanı, səhiyyə və təhsili əhatə edir.
