Azərbaycan, Bakı, 27 sentyabr /Trend, müxbir N.İsmayılova/
Azərbaycan Əmanətlərin Sığortalanması Fondu (ADIF) əmanətlərin sığorta sistemini genişləndirməyi və fərdi sahibkarların hesablarını əhatə etməyi planlaşdırır. Trend-in məlumatına görə, bunu çərşənbə axşamı jurnalistlərə Fondun icraçı direktoru Azad Cavadov deyib.
"Fond tərəfindən qanunvericiliyə dəyişikliklər layihəsi hazırlanıb. Bu dəyişikliklər fərdi sahibkarların əmanətlərinin sığortalanmasını, həmçinin investorların hüquqlarının müdafiəsini nəzərdə tutur", - Cavadov bildirib.
Onun sözlərinə görə, Fondun gündəliyində eyni zamanda investorların hüquqlarının təmini üçün ölkədə aparılan tədbirlərə kömək məqsədilə bir sıra tədbirlərin həyata keçirilməsi var.
AƏSF 2007-ci il 13 avqustda fəaliyyətə başlayıb.
Hazırda ölkədə fəaliyyət göstərən 44 bankdan 43-ü fondun üzvüdür. Bir bank isə Mərkəzi Bankın tələblərinə cavab verə bilmədiyi üçün məhdud lisenziya ilə fəaliyyət göstərir və əmanət qəbulu edə bilmir.
