Azərbaycan, Bakı, 28 sentyabr /Trend, müxbir A.Axundov/
Azərbaycanın Maliyyə Nazirliyi yanında Dövləvt Sığorta Nəzarəti Xidmətinə (DSNX) həyat sığortası üzrə şirkətlərin yaradılması ilə bağlı təkrar müraciət daxil olmayıb. Bu barədə Trend-ə çərşənbə günü DSNX-nin sektor müdiri Mahir Abdullayev məlumat verib.
"Biz müraciətləri yenidən işləmək üçün şirkətlərə qaytarmışıq, çünki sənədlərdə nöqsanlar var idi və onlara öz iradlarımızı təqdim etmişik. Hələlik onlardan təkrar müraciətlər daxil olmayıb", - Abdullayev deyib.
"Sığorta fəaliyyəti haqqında" qanuna uyğun olaraq, yeni səhmdar cəmiyyətə sığorta və təkrar sığorta fəaliyyəti üçün beş il müddətinə icazə verilir. Lisenziyanın verilməsi üçün müraciətə sığorta nəzarəti orqanı tərəfindən iki mərhələdə baxılır:
- Təsisçiyə, yaxud müvafiq qanunvericilik qaydası ilə səlahiyyətli şəxsə (şəxslərə) lisenziyanın verilməsi üçün ilkin müraciətə baxılması;
- Açıq səhmdar cəmiyyəti qismində dövlət qeydiyyatına qəbul olunduqdan sonra lisenziyanın verilməsi üçün yekun müraciətə baxılması.
Bundan qabaq DSNX-yə müvafiq müraciətlər AzSığorta, Alfa Sığorta, Ata Sığorta, Standard Insurance şirkətlərindən daxil olub. Analoji planlara Beynəlxalq Sığorta Şirkəti, "Azərbaycan Sənaye Sığorta" SŞ də malikdir.
Azərbaycanda bu gün həyat sığortası üzrə üç şirkət fəaliyyət göstərir - Atəşgah Həyat, Paşa Həyat, Qala Həyat.
Sentyabrın 28-nə olan rəsmi məzənnə 0,7869 AZN/USD təşkil edir.