Azərbaycan, Bakı, 19 oktyabr /Trend, müxbir E.İsmayılov/
Cari ilin yanvar-avqustunda Azərbaycana 37,6 mindən çox minik avtomobili idxal edilib. Bu isə 2010-cu ilin analoji dövrü ilə müqayisədə 14,5 faiz çoxdur. Bu barədə çərşənbə günü Trend-ə Dövlət Statistika Komitəsindən məlumat verilib.
Məlumata əsasən, yanvar-avqustda idxal edilən minik avtomobillərinin ümumi dəyəri 378,8 milyon dolları keçib. Bu isə ötən ilin eyni dövrü ilə müqayisədə 35,3 faiz çoxdur.
Yanvar-avqustda Azərbaycana 3377 ədəd yük avtomobili idxal edilib. Bu rəqəm 2010-cu ilin analoji dövrünə nisbətdə 11 faiz çoxdur. İdxal edilən avtomobillərin ümumi dəyəri təxminən 68,3 milyon dollar təşkil edib. Bu, ötən ilin analoji dövr göstəricisndən 6,9 faiz azdır.
Bundan əlavə, yanvar-avqustda respublikaya 364 ədəd avtobus idxal edilib ki, bu da 2010-cu ilin eyni dövrü ilə müqayisədə 35,2 faiz çoxdur. Həmin dövrdə ümumi dəyəri 15 milyon dollar olan avtomobil gətirilib. Bu rəqəm ötən ilin analoji dövr göstəricisindən 48,1 faiz azdır.
Cari ilin yanvar-sentyabrında Azərbaycanda 598 ədəd yük avtomobili istehsal edilib ki, bu da ötən ilin eyni dövrünün göstəricisindən 25,4 faiz çoxdur. Həmçinin, bu dövrdə ölkədə 252 ədəd minik avtomobili istehsal edilib. Bu, 2010-cu ilin yanvar-sentyabr göstəricisndən 31,7 faiz azdır.