Azərbaycan, Bakı, 24 noyabr /Trend, müxbir İ.Xəlilova/
Azərbaycan Maliyyə Nazirliyi sosial ipotekada 25 min ailənin tələbatının ödənilməsi üçün illik təxminən 1 milyard manatın ayrılmasını mümkün hesab etmir. Trend-in məlumatına görə, bu barədə cümə axşamı maliyyə naziri Samir Şərifov Milli Məclisdə 2012-ci il və növbəti üç il üzrə dövlət büdcəsi layihəsinin müzakirəsi zamanı deyib.
"Biz illik əsasda sosial ipotekaya dövlət büdcəsi xərclərinin 50 dəfə artırılması məsələsinə məsuliyyətlə yanaşmalıyıq. Belə ki, inflyasiya problemlərindən savayı, önəmli olan bu cür maliyyələşdirmənin sabit prosesidir", - Şərifov bildirib.
2012-cü il üzrə Azərbaycan dövlət büdcəsi layihəsində sosial ipotekaya 2011-ci ildə olduğu kimi, 20 milyon manatın ayrılması nəzərdə tutulub. Bu vəsaitlər təxminən 500-600 ailəyə kredit verməyə imkan yaradır.
Şərifovun sözlərinə görə, bir çox ölkələrdə maliyyə problemləri məhz ipoteka bazarından başlanıb. Belə ki, böyük həcmdə ipoteka kreditləri ayrılıb. Bu gün Yunanıstanda, eləcə də Avropanın bir çox ölkələrindəki problemlər məhz ucuz ipoteka kreditlərinin verilməsi ilə bağlıdır.
"Dövlət 20 il ərzində (ipoteka kreditinin verilmə müddəti) davamlı əsasda belə həcmdə və aşağı qoyuluşlar üzrə maliyyələşdirə bilməz. Bu baxımdan sosial ipotekanın maliyyələşdirilməsi üçün dövlət büdcəsi xərclərinin artırılmasına çox ehtiyatla yanaşmalıyıq", - nazir bildirib.
Bununla yanaşı, nazir gənc ailələrə müəyyən güzəştlərin verilməsini və mənzil problemlərinin həlli üçün kömək etməyi dəstəkləyir.
Hazırda Mərkəzi Bank yanında Azərbaycan İpoteka Fondunun şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Noyabrın 24-nə olan rəsmi məzənnə 0,7865 AZN/USD təşkil edir.
