Azərbaycan, Bakı, 12 yanvar /Trend, müxbir E.İsmayılov/
Azərbaycan Nəqliyyat Nazirliyi 2012-ci ilin aprelinə qədər Bakıda şəhərdaxili sərnişin avtobuslarında gedişhaqqı ödənişi prosesini avtomatlaşdırmağı planlaşdırır. Bu barədə cümə axşamı Trend-ə Nəqliyyat Nazirliyinin Nəqliyyat siyasəti və iqtisadiyyat şöbəsinin müdiri Sədrəddin Məmmədov məlumat verib.
Onun sözlərinə görə, bununla əlaqədar fəal işlər aparılır ki, aprelə qədər avtobuslarda gedişhaqqı ödənişləri prosesi avtomatlaşdırılsın. Nəzərdə tutulur ki, avtobuslarda ödənişlər müvafiq kartlarla həyata keçiriləcək.
Nəqliyyat Nazirliyindəki digər mənbənin əvvəl dediyinə görə, kart ödəniş sistemi iri sərnişin avtobuslarını əhatə edəcək.
Məmmədov deyib ki, avtobuslarda vahid ödəniş sisteminin avtomatlaşdırılması və tətbiqi üçün müvafiq cihazların quraşdırılması lazımdır.
Məmmədov əvvəl bildirmişdi ki, bu ildən etibarən nazirlik Bakının ictimai nəqliyyatında vahid gedişhaqqı ödənişi sisteminin tətbiqi üzrə işlərə başlaya bilər. Yeni sistem nəqliyyatın bütün növlərində gedişhaqqının ödənişi üçün vahid kartların istifadəsini və bununla bağlı xüsusi avadanlığın quraşdırılmasını nəzərdə tutur.