Azərbaycan, Bakı, 13 yanvar /Trend, müxbir A.Axundov/
Hava nəqliyyatındakı çətinliklər azərbaycanlı turistlərin Cənub-Şərqi Asiya, Latın Amerikası, eləcə də ABŞ-a səfər etmələrinə mane olur və turizmin inkişafı üçün bu sahənin yaxşılaşdırılması vacibdir. Bu barədə cümə günü Trend-ə Azərbaycan Turizm Assosiasiyasının rəhbəri Nahid Bağırov bildirib.
"Bu gün qeyd olunan regionlarda olmaq istəyən potensial turistlər var, lakin hava nəqliyyatındakı problemlər üzündən onlar öz səfərlərini daha münasib vaxtadək təxirə salırlar. Turizmin inkişafı üçün həmin istiqamətlərdə hava nəqliyyatının sahmana salınması faydalı olaradı. İnsanlar Avropaya, Türkiyəyə və BƏƏ-yə gedirlər, çünki oraya çatmaq asandır. Bu sahədə yeniliklərin vaxtı çatıb", - Bağırov deyib.
Lakin Azərbaycan Mədəniyyət və Turizm Nazirliyinin Turizm şöbəsinin müdiri Aydın İsmiyevin cümə günü Trend-ə bildirdiyinə görə, həmin marşrutlar üzrə aviareyslərin açılışı hələlik rentabelli deyil, çünki ora tursit axını böyük deyil.
"Azərbaycanlı turistlərin ənənəvi olaraq səfər etdikləri ölkələrə - Türkiyə, BƏƏ və Avropa ölkələrinə aviareyslərin sayı kifayət qədər yetərlidir. Ənənəvi turist axını istiqamətləri üzrə həm bizdən, həm də əks tərəfdən reyslər çoxdur", - İsmiyev deyib.
