Azərbaycan, Bakı, 18 yanvar /Trend, müxbir E.İsmayılov/
Bakıda avtomobil dayanacaqları ilə bağlı problemlərin həll edilməsi üçün 100-dən artıq dayanacaq tikiləcək. Bu barədə çərşənbə günü Trend-ə Azərbaycan Nəqliyyat Nazirliyinin mətbuat xidmətinin rəhbəri Namiq Həsənov deyib.
Onun sözlərinə görə, bu məqsədlə cari ildə layihə və tikinti işləri aparılacaq.
"Dayanacaqlar yol kənarları və dayanacağın qadağan edildiyi yerlərdə avtomobillərin saxlanması ilə yaranan problemləri həll etmək üçün vacibdir", - Həsənov qeyd edib.
Onun sözlərinə görə, yeraltı və yerüstü dayanacaqların tikintisi planlaşdırılır.
"Bu dayanacaqların tutumu müxtəlif olacaq", - Həsənov deyib.
Ötən həftə Nəqliyyat Nazirliyi ilə Respublika Baş Dövlət Yol Polisi İdarəsinin birgə müşavirəsində Bakının nəqliyyat infrastrukturu müzakirə edilib.
Müşavirədə qeyd olunub ki, paytaxt ərazisində fəaliyyət göstərən taksilərin, avtobusların dayanacaqdan kənar yerlərdə saxlaması, sərnişin düşürdüb-mindirməsi, təmir gedən ərazilərdə alternativ yolların bərbad vəziyyətdə olması paytaxtda nəqliyyatın hərəkətində ciddi problemlər yaradır.
Taksilərin və avtobusların təyin olunmamış yerlərdə dayanmasının qarşısını almaq üçün Nəqliyyat Nazirliyi ilə Respublika Baş Dövlət Yol Polisi İdarəsi birgə reydlər keçirəcəklər.