Azərbaycan, Bakı, 6 mart /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti yerli sığorta şirkətlərinə reklama daha çox diqqət ayırmağı tövsiyə edir.
Tövsiyələr Dövlət Xidmətinin sifarişi üzrə Türkiyənin "GfK Türkiye" şirkətinin apardığı sığorta bazarının marketinq araşdırmasının nəticələri əsasında hazırlanıb və sığortaçılara paylanılıb. Bu barədə çərşənbə axşamı Trend-ə sığorta şirkətlərinin birindəki mənbə bildirib.
"Əhalinin sığorta ilə bağlı məlumatı az olduğuna görə şirkətlərə inam hissi çox zəifdir. İlk növbədə, sığorta şirkətləri əhaliyə özləri barədə məlumat verməli, xidmətlərini təklif etməlidirlər", - tövsiyələrdə deyilir.
Müştərilərin inamını qazanmaq üçün şirkətlər müqaviləyə əsasən xidmət göstərməli, müştəriləri "get-gələ" salmamalıdırlar.
Aparılan araşdırma göstərib ki, respondentlərin sığorta haqqında məlumatlılıq səviyyəsi çox aşağıdır.
"Əksər iştirakçılar sığorta şirkətlərinin göstərdiyi xidmətlərin qiymətlərinin yüksək olmasından və xidmətin düzgün icra edilməməsindən şikayətləniblər", - nəticələrdə deyilir.
Araşdırmalar sığorta şirkətlərinə inamın aşağı səviyyədə olduğunu müəyyənləşdirib.
"Sığorta şirkətlərinin dəymiş zərərin ödənilməsində müştəriləri əlavə çətinliyə salması narazılıqların əsas mənbəyi sayıla bilər", - araşdırmanın nəticələrində deyilir.