Azərbaycanda bankların girov əmlakının satışının ƏDV-dən azad edilməsi təklif edilir
Azərbaycan, Bakı, 7 aprel /Trend, müxbir A.Axundov/
Azərbaycanda Amerika Ticarət Palatası (AmCham) ölkə banklarının müvafiq hərraclarda satdıqları girov əmlakının əlavə dəyər vergisindən (ƏDV) azad edilməsini mqəsədəuyğun hesab edir. Trend-in məlumatına görə, bu barədə 2014-cü il üzrə Azərbaycanda işgüzar mühitin inkişafı üzrə "AmCham"ın hər il dərc etdirdiyi təkliflər paketində deyilir.
Sənəddə bildirilir: "Azərbaycanın Vergi Məcəlləsinin 13.2.14.1 maddəsinə uyğun olaraq, kredit girovlarının təqdim edilməsi və ya qaytarılması ƏDV-dən azad edilmiş maliyyə xidməti sayılır. Bankların kreditlərin qaytarılmaması zamanı məruz qaldıqları itkilər bu kreditlər üzrə girovlarla kompensasiya olunur. Məcəlləyə uyğun olaraq, banklar hərracların köməyi ilə girovu sata bilərlər və əgər əmlak satılarsa, onda bu satış maliyyə xidməti hesab edilmir və ƏDV-yə malikdir".
Sənədə görə, göstərilən prosedur banklar üçün ƏD V xərclərini artırır. Azərbaycanda bu verginin dərəcəsi 18 faiz təşkil edir.
"AmCham" qeyd edir: "Bundan əlavə, bu, banklara nağd vəsaitin axınına mənfi təsir edə bilər. Yuxarıda göstərilənləri nəzərə almaqla palata bank hərraclarında girov əmlakın satışının ƏDV-dən azad edilməsini təklif edir".
