Azərbaycan, Bakı, 30 may /Trend, müxbir Z.Qurbanova/
"DəmirBank" ASC öz ipoteka proqramı çərçivəsində kreditlərin verilməsi şərtlərini dəyişib. Bu barədə cümə günü Trend-ə bankdan deyiblər.
"DəmirBank"dan qeyd ediblər ki, mayın əvvəlindən bank yeni şərtlər əsasında ipoteka kreditləri verir: "Kreditlər üzrə dərəcə 16 faizədək endirilib, kreditlərin verilmə müddəti isə 10 ilədək uzadılıb. Kreditin məbləği 200 min manatadək artırılıb, ilkin ödəniş isə 35-dən 25 faizədək azaldılıb".
Bankın ipoteka portfelinin ümumi həcmi təqribən 35 milyon manatdır. Bankdan bildiriblər ki, dövlət ipoteka kreditləşməsi proqramı xətti ilə kreditlərə tələbat güzəştli şərtlərə görə daha böyükdür.
Hazırda Azərbaycan İpoteka Fondunun şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 50 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Bankdan qeyd ediblər ki, hazırda "DəmirBank" dövlət xəttilə ipoteka kreditləri vermir, çünki yanvarda İpoteka Fondunun ayırdığı vəsait istifadə edilib: "Biz yeni vəsaitlərin ayrılmasını gözləyirik".
"DəmirBank"dan Azərbaycan Mərkəzi Bankının mənzil əmanət banklarının yaradılması haqqında ideyasına münasibət də bildirilib: "Hazırda bu, bankın əhatə dairəsinə daxil deyil və fəaliyyətin prioritet məsələsi deyil. Əgər belə bankların yaradılması haqqında qərar qəbul edilərsə, o zaman bank fəaliyətini bu qərara uyğun quracaq".