Azərbaycan, Bakı, 4 noyabr /Trend, müxbir Azad Həsənli/
"FINCA Azerbaijan" Bank Olmayan Kredit Təşkilatı baş lisenziyanın alınmasına hazırlıq çərçivəsində Azərbaycanda bank fəaliyyətinin həyata keçirilməsi strategiyasını hazırlayır. Bu barədə Trend-ə FINCA-nın ölkə üzrə direktoru Timoti Tarrant bildirib.
T.Tarrant qeyd edib: "Biz Azərbaycan Mərkəzi Bankının nümayəndələri ilə görüşdük və bank fəaliyyətinin aparılması üçün lisenziyanın alınması məsələsini müzakirə etdik. FINCA dünyanın bir çox ölkələrində bank və bank olmayan kredit təşkilatı kimi fəaliyyət göstərir. Azərbaycanda bank olmayan kredit təşkilatı kimi çalışırıq, lakin müştərilərimizə təkcə kredit yox, həm də digər maliyyə xidmətləri göstərmək istərdik".
"FINCA Azerbaijan"ın rəhbəri deyib ki, indi kredit təşkilatının fəaliyyətinin genişləndirilməsi üçün imkanlar araşdırılır.
Onun sözlərinə görə, hazırkı mərhələdə bank lisenziyasının alınması Azərbaycanda FINCA-nın strateji prioritetidir: "Biz strateji olaraq lisenziya almaq istərdik. İndi biz strukturu formalaşdırmalı, fəaliyyət strategiyası hazırlamalı və onu Azərbaycan Mərkəzi Bankına təsdiqlənmək üçün təqdim etməliyik. Şübhəsiz ki, Mərkəzi Bank ölkədə bank sektorunun inkişaf strategiyasına malikdir, öz növbəsində, FINCA-nın da özünəməxsus inkişaf strategiyası var. Ümidvaram ki, gələcəkdə bu məsələdə ümumi təmas nöqtəsini tapacaq və hər iki strategiyanı birləşdirəcəyik ki, bu da bizə müştərilərə digər xidmətlər göstərməyə imkan verəcək".
"FINCA International" Azərbaycanda 1998-ci ildən fəaliyyət göstərir. Bakıda və ölkənin regionlarında təşkilatın 65 filialı mövcuddur. Şirkətin müştəri bazası 150 min nəfəri ötür.