İyunun 22-də Maliyyə Nazirliyində Azərbaycanda ödəniş sistemlərinin inkişaf məsələlərinin müzakirəsi üçün müşavirə keçirilib. Trend xəbər verir ki, Milli Bankın idarə heyəti sədrinin birinci müavini Alim Quliyevin sözlərinə görə, 2004-cü ilin dekabranda prezidentin sərəncamı ilə milli ödəniş sisteminin inkişaf proqramı təsdiqlənib və onun icrası ilə bağlı müzakirələr keçirilib.
"Proqramın komponentlərindən biri dövlət orqanlarının (Maliyyə, Vergilər nazirlikləri, Dövlət Gömrük Komitəsi) bu sistemə inteqrasiyasıdır. Hazırda avtomatlaşdırılmış xəzinə sistemi yaradılır. Müvafiq sistem Vergilər Nazirliyi və DGK-də yaradılıb. Proqramın icrası çərçivəsində biz həmin dövlət orqanları ilə çox sıx əməkdaşlıq etmişik" - deyə A.Quliyev qeyd edib. Xəzinənin avtomatlaşdırılmasından sonra bütün bu dövlət orqanları Milli Bankın kiçik ödənişləri üzrə milli ödəniş sisteminə (HONKS) inteqrasiya edəcək. Nəticədə xəzinədə xərclərin və gəlirlərin idarəsi vahib hesabdan həyata keçiriləcək.
Elektron daşıyıcılar vasitəsilə Maliyyə, Vergilər nazirlikləri və DGK istənilən vergi növü haqqında məlumat ala biləcək. Hazırda Vergilər Nazirliyində ayın başa çatmasını gözləyirlər ki, vergi daxilolmalarının müqayisəsi aparılsın. Bundan sonra gündəlik məlumatı almaq mümkün olacaq.
Sədr müavinin sözlərinə görə, xəzinə artıq Xaçmazda vahid hesabdan idarəçilik üzrə pilot layihəsini gerçəkləşdirməyə başlayıb, lakin ilin sonuna qədər bu proses bütün respublikanı əhatə edəcək. Avtomatlaşdırma tam başa çatdıqdan sonra bütün regionlar mərkəzləşdirilmiş idarəçiliyə keçəcək.
