Vergilər Nazirliyinin kollegiya iclası mövcud vergi potensialının düzgün qiymətləndirilməsi və bu potensialdan səmərəli istifadə olunması barədə vergi orqanlarının qarşısına qoyulmuş tələblərin yerinə yetirilməsinin təmin edəcək fəaliyyət planını təsdiqləyib. Bu tədbirlər Azərbaycan prezidentinin sədrliyilə Nazirlər kabinetinin 2006-cı il iyulun 31-də birinci yarımilin sosial-iqtisadi yekunları ilə əlaqədar keçirilmiş iclasında vergi orqanları qarşısında qoyulmuş tələblər əsasında hazırlanıb.
Nazirlikdən Trend ə verilən məlumata əsasən, fəaliyyət planına əsasən, qanunvericilik aktlarına əlavə və dəyişikliklərin edilməsi haqqında layihələri 2006-cı il sentyabrın 1-dək hazırlamaq planlaşdırılır.
Bunlar əsasən nağd hesablaşmalara, yəni əhalilə nağd hesablaşma aparan obyektlərdə nağd hesablaşmaların aparılması qaydalarının pozulmasına görə tətbiq edilən maliyyə sanksiyalarının diferensiallaşdırılmasına aiddir. Bundan əlavə, əhalilə nağd hesablaşma aparan obyektlərdə nağd hesablaşmaların aparılması qaydalarının pozulmasına görə son hədd kimi müəyyən olunmuş maliyyə sanksiyalarının tətbiqindən sonra yenidən qanun pozuntusuna yol vermiş obyektlərin fəaliyyətinin dayandırılmasını təmin edəcək tədbirlər görüləcək.
Əhalilə nağd hesablaşma aparan obyektlərdə nağd hesablaşmaların aparılması qaydalarının pozulmasına görə fəaliyyəti məhdudlaşdırılmış sahibkar fəaliyyətini qeyri-qanuni bərpa etdikdə cinayət məsuliyyətinə cəlb olunacaq.
Vergi orqanunda uçotda olmayan şəxsin qanunsuz sahibkarlıq fəaliyyəti də dayandırılacaq. Əlavə dəyər vergisindən yayınmaların qarşısının alınması məqsədilə "Əlavə Dəyər Vergisi üzrə Bankı Hesabları"nın tətbiqi nəzərdə tutulur.
Fəaliyyət planında həmçinin "icarə haqqı məbləğlərinin minimum hədləri" haqqında müvafiq qanun layihəsinin hazırlanması nəzərdə tutulub.
Çəkilmiş xərclərə görə vergilərin hesablanması "Şəffaf gəlirlər" modelinin hazırlanması, təqvim ili ərzində şəxslər tərəfindən müəyyən ir məbləğdən yüuxarı daşınar və daşınmaz əmlak əldə edilməsi zamanı həmin əmlakın alınması üçün istifadə olunmuş maliyyə vəsaitlərinin "vergiyə cəlb olunması" barədə bəyannamələrin vergi orqanlarına məcburi təqdim edilməsi sisteminin yaradılması da planlaşdırılır. Vergi ödəyicisinin qanunvericiliyə uyğun olaraq qeydiyyatda olan daşınar əmlakının və 3 ildən az müddət ərzində əsas yaşayış yeri olduğu daşınmaz əmlakının təqdim edilməsindən gəlirin hesablanması metodologiyası hazırlanacaq.
Vergi orqanları ictimai iaşə ilə məşğul olan obyektləri müəyyən meyarlara əsasən təsnifatlandıracaq. Bunun üçün vahid vergi məbləği müəyyənləşdiriləcək.
Vergi qanunvericiliyinə pərakəndə satışla məşğul olan vergi ödəyicilərinə dair dəyişikliklər ediləcək.
