Bakı-Samur avtomobil yolunun bir hissəsinin yenidənqurulması üzrə tenderin qalibi- Çexiyanın ZS Brno şirkəti işlərin təxminən 19%-ni ($12,2 mln) yerinə yetirib. Bu barədə Trend ə Azərbaycanın Nəqliyyat Nazirliyindən məlumat verilib. İşlər Bakı-Quba yolunun 111 - 134 kilometrliyində həyata keçiriləcək. Şirkət, həmçinin, Quba şəhərinin yanından keçən yol da salacaq. Bundan başqa, layihə çərçivəsində təxminən 9 körpü tikiləcək. Bakı-Quba magistralının yenidənqurulması üzrə layihənin 2008-ci ilin dekabrında başa çatması nəzərdə tutulur.
AzerInsaatServis bu şirkətin subpodratçısı kimi çıxış edir. Layihə isə Çexiyanın "Eksimbank"ının krediti hesabına maliyyələşdiriləcək.
Bakı-Samur avtomobil magistralının yenidənqurulması layihəsinin gerçəkləşdirilməsi üçün vəsait Avropa Yenidənqurma və İnkişaf bankı, o cümlədən "Eksimbank" tərəfindən ayrılır. AYİB-in ayırdığı vəsait $100 mln təşkil edir. Kredit dövlət zəmanəti və standart şərtlərlə ayrılır. Bu vəsaitlər yolun 28 km-dən 89 km-dək olan hissəsinin yenidənqurulmasına sərf olunacaq.
Ümumi uzunluğu 208 km olan yolun yerdə qalan hissəsi isə "Eksimbank"ın ayırdığı $180 mln məbləğində kredit hesabına yenidən qurulacaq. Bankın krediti sindikatlaşdırılıb. Vəsaitlərin ümumi həcmindən $102 mln "Eksimbank", $78 mln isə Fransanın BNP Paribas bankı tərəfindən ayrılıb. Kredit Libor+0,6%-lə və 4 il güzəşt dövrü ilə 15 il müddətinə ayrılıb.
