Almaniya, Koreya, Çin və başqa ölkələrin istehsalçıları Azərbaycana böyük tutumlu avtobusların gətirilməsi təklifi ilə çıxış ediblər. Hazırda bu təkliflərin iqtisadi qiymətləndirilməsi gedir. Trend in xəbər verdiyi kimi, bu barədə nəqliyyat nazirinin birinci müavini Musa Pənahov məlumat verib.
Onun sözlərinə görə, təqdim olunan təkliflərdən ən sərfəlisi, Bakı şəhərinin küçələrinə uyğun gələni seçiləcək. Birinci mərhələdə 200-dək belə avtobusun alınması nəzərdə tutulur. Gələcəkdə isə daha 500 avtobusun alınması planlaşdırılır.
Bu, onunla izah olunur ki, aparılmış qiymətləndirmələrə əsasən, sərnişin daşınması və marşrutların təmini üçün 800-ə yaxın böyük tutumlu və 2 minə yaxın orta tutumlu avtobuslar lazımdır, - deyə M. Pənahov bildirib.
Bütün bu işlər Azərbaycan prezidentinin "2006-2007-ci illər üçün Bakı şəhərində nəqliyyat sisteminin təkmilləşdirilməsi haqqında" fərmanı çərçivəsində həyata keçiriləcək. Yeni avtobusların alınması şəhərin nəqliyyat infrasturkturunda bəzi problemləri həll etməyə, eləcə də sərnişinlərə xidmətin keyfiyyətini yüksəltməyə imkan yaradacaq.