Gələn il Vergilər Nazirliyinin dövlət büdcəsinə daxilolmalarının təxminən 50% artacağı ehtimal olunur. Bu göstərici iqtisadi planlaşdırma əsasında müəyyənləşdirilib. Trend xəbər verir ki, bu haqda Azərbaycanın vergilər naziri Fazil Məmmədov məlumat verib.
Onun sözlərinə görə, daxilolmaların artırılması həm neft, həm də qeyri-neft sektorunun inkişafı ilə bağlıdır. Bundan əlavə, bu ildən Azərbaycan Beynəlxalq Əməliyyat Şirkəti iştirakçılarının mənfəət vergisi ödənilməyə başlayıb. Ona görə də büdcənin icrası ilə heç bir problem olmayacaq.
"Gələn ilin büdcəsi çox gərgin, ağır müəyyənləşdirilib, lakin büdcənin icrası mümkündür", - deyə F.Məmmədov qeyd edib.
2007-ci ilin büdcəsində ÜDM 22,2 mlrd. AZN səviyyəsində planlaşdırılıb, onun real artımı 26,3%-i ötəcək. Əhalinin adambaşına düşən ÜDM həcmi 2600 AZN, orta aylıq əmək haqqı isə - 195,1 AZN təşkil edəcək. Büdcə proqnozları neftin bir barelinin 50 ABŞ dolları olmasını nəzərə almaqla tərtib olunub.
2007-ci ildə vergi güzəştlərini minimuma çatdırmaq, qeyri-neft sektorunda yığımı artırmaq və ilk dəfə bölgələrdə vergi yığımını artırmaq nəzərdə tutulub. Bu isə ilk növbədə son vaxtlar onların müşahidə olunan sürətli inkişafı ilə bağlıdır.
2007-ci ildə dövlət büdcəsinin gəliri 2001-ci illə müqayisədə 6,8 dəfə artacaq və 5 336 mln. AZN və ya ÜDM həcminin 24%-ni, xərclər isə - 5 715 mln. AZN və ya ÜDM-in 25,7%-ni təşkil edəcək.
