AZAL Dövlət Konserni respublika daxili reyslərin həyata keçirilməsi üçün Fransa istehsalı olan 6 təyyarənin alınması ilə bağlı ilkin razılığa gəlib. Bu barədə Trend ə hökumətdən məlumat verilib. Bunlar 40-50 nəfər sərnişin tutumlu təyyarələr olacaq.
Hazırda ölkə hökuməti təyyarələrin alınmasının maliyyələşdirilməsi imkanlarını nəzərdən keçirir. 6 təyyarənin təxmini dəyəri $90 mln təşkil edəcək.
DK-dən qeyd edilib ki, Fransa təyyarələri analoji dərəcəli digər təyyarələrdən iki dəfə effektivdir. Bununla yanaşı, Azərbaycan hələ Ukrayna istehsalı olan təyyarələrin alınmasından rəsmən imtina etməyib. Qeyd edək ki, bu təyyarələrdən biri ötən ilin dekabrında qəzaya uğrayıb. Bu, qəzanın səbəbləri haqqında rəsmi rəy elan edildikdən sonra baş verə bilər.
Qəzanın səbəbləri aşkar edilənədək "AZAL" AH-140-100 təyyarələrinin alınması və istismarını dayandırıb. AH-140-100 markalı təyyarə "AZAL" və Xarkov Dövlət Aviasiya Müəssisəsi arasında 8 iyul 2004-cü ildə imzalanmış müqavilə əsasında alınmışdı. Müqavilədə təyyarələrin texniki-uçuş heyətinin təlimi və s. də nəzərdə tutulub. Müqavilənin dəyəri $36,4 mln (4 təyyarənin hər biri $9,1 mln) təşkil edir.