2006-cı ilin sentyabr ayından Azərbaycan dəmir yolu ilə neft və neft məhsullarının daşınması üçün qiymətlərin $1/t artırılması tarifin özünün artmasına səbəb olmayıb, belə ki, onun baza qiyməti dəyişməz qalıb. "Azərbaycan Dövlət Dəmir Yolu (ADDY) idarəsi güzəştdən istifadə etməklə təxminən 50% neft və neft məhsulları daşıyırdı. Bu güzəştlərin bir hissəsi ləğv edilib və bu da tarifin dəyişməsinə səbəb olub", - deyə bu gün ADDY idarəsinin rəisi Arif Əsgərov "Dəmir yol işçiləri günü"nü qeyd edərkən bildirib. Bu barədə Trend xəbər verir.
Onun sözlərinə görə, ADDY idarəsi Azərbaycan ərazisində neft yüklərinin daşınması üçün tariflərin güzəşt faizini azaldıb. "Beləliklə, neft və neft məhsullarının bir tonuna görə təxminən 1 ABŞ dollarına bərabər məbləğ üçün güzəştlər ləğv edilib. Həmin güzəştlər yalnız TRACECA nəqliyyat dəhlizi üzrə daşınmada tətbiq olunurdu", - deyə o bildirib.
Tarifin artmasına qədər bir ton neftin daşınması üçün 5 ABŞ dolları alınırdı. Analoji artım bir tonuna görə təxminən 6 ABŞ dolları alınan neft məhsullarının daşınmasında da baş verib.
Bununla yanaşı, ADDY idarəsi nümayəndələrinin sözlərinə görə, Azərbaycan dəmir yolunda neft və neft məhsullarının daşınması üçün tarif ən aşağı tariflərdəndir.
