Azərbaycanın Əmək və Əhalinin Sosial Müdafiə Nazirliyi Dünya Bankı ilə birgə gerçəkləşdirilən "Pensiyalar və sosial təminat" layihəsi çərçivəsində tender elan edib. Trend in xəbər verdiyi kimi, tenderin predmeti avtomobillərin və Əmək Nazirliyinin sosial təminat mərkəzləri üçün bununla bağlı xidmətlərin alınmasından ibarətdir. 34 ədəd avtomobilin alınması nəzərdə tutulur. I lot - 32 avtomobil: 4 qapılı, benzin mühərrikli, həcm - 1600-2000 kub sm; II lot - 4 qapılı, benzin mühərrikli, həcm - 1600-1800 kub sm: 2 avtomobil.
Tenderdə iştirakın dəyəri $200 və ya onun manatla ekvivalentidir. Sənədlər dekabrın 7-dək qəbul olunur və elə həmin tarixdə də açılacaq. Layihənin ümumi dəyəri $15,8 mln. təşkil edir. Bunun 10 mln dolları DB-nin ayırdığı kreditin payına düşür. Layihə 3 komponentdən ibarətdir. I komponent sosial yardımı idarəetmə sisteminin təkmilləşdirilməsini, 2006-cı ilin iyulundan tətbiq olunan ünvanlı sosial yardım proqramının yaradılmasını nəzərdə tutur. Bu komponent Əmək Nazirliyinə şamil edilir. Bu yaxınlarda DB Nazirliyin ünvanlı sosial yardımın tətbiqi çərçivəsində strukturda korporativ şəbəkənin yaradılması ilə bağlı təklifini qəbul edib. Bu təklif nazirliyin şöbələrində nəzarəti həyata keçirmək və ünvanlı sosial yardımın verilməsinin monitorinqini aparmaq üçün server və qlobal şəbəkənin yaradılmasını nəzərdə tutur.
II komponent sosial sığortanı idarəetmə sisteminin təkmilləşdirilməsi üçün nəzərdə tutulub. Fərdi uçot sistemi 2007-ci ildən tətbiq olunacaq və hazırda işçilərə fərdi şəhadətnamələrin verilməsi prosesi başa çatır. Sosial islahatlara $8 mln vəsaitin ayrılması planlaşdırılır. Bunun $5 mln-u DB-nin, $800 mini BMTİP, yerdə qalan hissə isə dövlət büdcəsi və Dövlət Fondunun vəsaitləri hesabına ayrılacaq.
III komponentə layihəni idarəetmə, monitorinq və qiymətləndirmə daxildir.
