Azərbaycan Dövlət Neft Fondunun (ARDNF) məlumatlarına görə, 2006-cı ilin yanvar-sentyabr ayları ərzində fondun gəlirləri 730,7 mln. manat, xərcləri isə - 606,8 mln. manat təşkil edib. Bu barədə Trend xəbər verir. Bugünkü mətbuat konfransında Neft fondunun İcraçı direktoru Şahmar Mövsümov bildirib ki, neft müqavilələrinin həyata keçirilməsindən gələn gəlir 684,3 mln. manat, o cümlədən mənfəət neftinin satışından - 670 mln. manat, neftin Azərbaycan ərazisindən keçməklə, Bakı-Supsa neft kəməri ilə nəqlinə görə tranzit ödənişdən - 10,9 mln. manat, akrlar üzrə ödənişdən - 1,2 mln. manat, bonuslardan - 1,8 mln. manat səviyyəsində olub.
9 ay ərzində xarici investorlar tərəfindən verilmiş aktivlərdən gələn gəlir 0,5 mln. manat təşkil edib. Neft fondunun vəsaitlərinin idarə olunmasından 41,3 mln. manat gəlir əldə olunub.
Hesabat dövrü ərzində Dövlət Neft Şirkətinin neftin müqavilə qiyməti və respublikadaxili topdan satış qiyməti arasında fərqdən ödənişi 5,1 mln. manat təşkil edib.
Neft fondunun xərclərinin strukturunda qaçqın və məcburi köçkünlərin sosial-məişət vəziyyətinin yaxşılaşdırılması üzrə tədbirlər üçün 46,8 mln. manat, AR-ın BTC ixrac kəmərinin tikintisi layihəsində iştirak payını maliyyələşdirmək üçün - 75,1 mln. manat ayrılıb, dövlət büdcəsinə transfertlər isə 455 mln. manat təşkil edib. Neft fondunun vəsaitləri hesabına hesabat dövründə Samur-Abşeron suvarma sisteminin yenidən qurulması və Oğuz-Qəbələ zonasından Bakıya qədər su kəmərinin çəkilməsi layihələri maliyyələşdirilib və bunun üçün müvafiq olaraq 7,5 mln. manat və 1,7 mln. manat ayrılıb. Ötən il Fondun idarəsi üzrə xərclər 0,7 mln. manat təşkil edib, Dövlət investisiya şirkətinin nizamnamə kapitalının formalaşdırılması üçün isə 20 mln. manat ayrılıb.
Hesabat dövründə Neft fondunun büdcədənkənar xərc və ödənişləri, o cümlədən onun aktivlərinin yenidən qiymətləndirilməsi ilə bağlı xərclər 29,6 mln. manat təşkil edib.
30 sentyabrda Fondun aktivləri ilin əvvəli ilə müqayisədə 7,4% artaraq, 1 374,8 mln. manat (təxminən 1 569 mln. ABŞ dolları) təşkil edib, 1 yanvar 2006-cı ildə isə bu göstərici 1280,4 mln. manat (təxminən 1 394 mln. ABŞ dolları) səviyyəsində olub.
