2006-cı ilin yanvar-oktyabr aylarında Azərbaycanın nəqliyyat vasitələri ilə 20409,1 min ton yük daşınıb, bu isə 2005-ci ilin analoji dövrü ilə müqayisədə 16,2% çoxdur. Bu barədə Trend xəbər verir. Yüklərin ümumi həcmindən 11610,3 min ton ixracın, 8799,1 min ton isə idxalın payına düşüb.
İxrac əməliyyatları üzrə, əsasən, dəniz (5888, 2 min ton), dəmir yolu (1116, 5 min ton), avtomobil (405,5 min ton), hava (3 min ton) nəqliyyatı və boru kəməri ilə nəql (4190,3 min ton) fərqlənib.
İdxal əməliyyatları üzrə - dəniz nəqliyyatının payına 234,5 min ton yük, dəmir yolunun payına 4943,4 min ton, avtomobil nəqliyyatının payına 918,9 min ton, hava nəqliyyatının payına - 21,8 min ton və boru kəmərinin payına 2646, 3 min ton yük düşüb.
Azərbaycan ərazisindən tranzit qismində 555 96, 7 min ton yük daşınıb. Yüklər əsasən İsveçrədən (1769,1 min ton), İtaliyadan (1488,1 min ton), Gürcüstandan (1014,9 min ton), Tacikistandan (333,6 min ton), Rusiyadan (184,1 min ton), Türkmənistandan (154,8 min ton), İrandan (144 min ton), Türkiyədən (150,1 min ton) və Kiprdən (112 min ton) daşınıb.
Azərbaycan ərazisindən keçən tranzit yükünün ümumi həcmi 82,98% təşkil edib və ya 2005-ci ilin analoji dövrü ilə müqayisədə 1147,7 min ton aşağı düşüb.
Bu dövr ərzində Azərbaycanın gömrük orqanları 152347 yük gömrük bəyannamələri (204013 əlavə vərəqlə) tərtib edib. Onlardan 32932-si (38103 əlavə vərəqlə) ixracın, 119415-i isə (165910 əlavə vərəqlə) idxalın payına düşüb.
