2007-ci ildə Bakıya ilk səfər edəcək nümayəndə heyəti ötən il bir neçə dəfə təxirə salınan Rusiya Federasiyasının Kurqan adminstrasiyasından olacaq. Rusiyanın Azərbaycandakı ticarət nümayəndəliyinin rəhbəri Yuri Şedrinin çərşənbə günü Trend ə verdiyi məlumata əsasən bu səfər mart ayına planlaşdırılıb və hazırda dəqiq tarix müəyyənləşdirilir.
Nümayəndə heyətinə Kurqan vilayətinin qubernatoru Oleq Boqomolov rəhbərlik edəcək. Səfər çərçivəsində Azərbaycan hökuməti ilə Kurqan vilayəti arasında ticarət, iqtisadiyyat, elmi-texniki və mədəni sahələrdə artıq hazırlanmış müqavilələr imzalanacağı planlaşdırılıb.
Nümayəndə heyətinin tərkibində maşınqayırma və digər sənaye sahələri üzrə ixtisaslaşmış iş adamları qrupu təmsil olunacaq. Onların iştirakı ilə biznes-forumun keçirilməsi planlaşdırılıb.
Ticarət nümayəndəliyinin rəhbərinin sözlərinə görə, bu il Rusiyanın digər vilayətlərindən də nümayəndə heyətlərinin səfəri gözlənilir. Sentyabr ayında Moskva vilayətindən nümayəndə heyətinin səfəri gözlənilir. Y.Şedrin qeyd edib ki, digər nümayəndələrin səfərləri hələ dəqiqləşdirilir.
