ABŞ hökuməti Azərbaycanın Ümumdünya Ticarət Təşkilatına (ÜTT) daxil olması məsələsində ölkəni tamamilə dəstəkləməyə hazır olduğunu bildirib. Bu barədə Trend ə iqtisadi inkişaf naziri Heydər Babayev məlumat verib.
"Onların 2003-cü ildən Azərbaycana göstərdikləri texniki yardım çərçivəsində məsləhət yardımını ABŞ bərpa etmək istəyir ki, bizim qarşımıza qoyulan məqsədlər, məhz 2007-ci ildə ÜTT üzvlüyünə hazır olmaq məsələsi yerinə yetirilsin", - deyə nazir bildirib.
Azərbaycan ÜTT-yə daxil olmaq üzrə danışıqların V mərhələsinə hazırlaşır. Danışıqların 2007-ci ilin birinci yarısında keçirilməsi planlaşdırılır. İndiyədək Azərbaycan ÜTT ilə 4 görüş keçirib. İlk iki görüş xarici ticarət rejimi məsələlərinin müzakirəsinə həsr olunub, 2005-ci ildən başlayaraq isə, son iki görüşdə ölkə tammiqyaslı danışıqlara başlayıb.